ސްރީ ލަންކާއަށް ބޯކޮށް ވާރޭ ވެހި ބިންގަނޑު ކަނޑައިގެން ދިއުމާއި ފެންބޮޑުވުމުގެ ސަބަބުން 30 އަށް ވުރެ ގިނަ މީހުން މަރުވެފައިވާ ކަމަށް އޮފިޝަލުން ބުނެފިއެވެ.

ސަރުކާރުގެ ޑިޒާސްޓާ މެނޭޖްމަންޓް ސެންޓަރުން ބުނީ ރިޕޯޓުކޮށްފައިވާ މީހުންގެ ތެރެއިން 18 މީހަކު މަރުވެފައި ވަނީ ކޮލަމްބޯގެ އިރުން 300 ކިލޯމީޓަރު ދުރުގައި އޮންނަ ބަދުއްލާ އާއި ނުވަރާ އެލިޔާ ސަރަހައްދުގައި ކަމަށެވެ.

އަދި ބިންގަނޑު ކަނޑައިގެން ދިއުމުގެ ހާދިސާގައި 14 މީހަކު ގެއްލިފައިވާ ކަމަށް އެ ސެންޓަރުން ބުންޏެވެ.

ލަންކާއަށް މޫސުން ގޯސްވެ މިދިޔަ ހަފްތާއިން ފެށިގެން މަރުވި މީހުންގެ އަދަދު ވަނީ 31 އަށް އަރާފައެވެ. ބޯކޮށް ވާރޭވެހި ގެދޮރާއި ދަނޑުތަކާއި މަގުތަކުގައި ފެންބޮޑުވެ ބޮޑެތި ގެއްލުންތަކެއް ވަނީ ލިބިފައެވެ.

އޮފިޝަލުން ބުނީ ގިނަ ކޯރުތައް ފުރި، މަގުތައްވެސް ބަންދުވެފައިވާ ކަމަށެވެ. އޮފިޝަލުން ބުނި ގޮތުގައި އެ ޕްރޮވިންސްތައް ގުޅުވައިދޭ ބައެއް ބޮޑެތި މަގުތައް މިހާރު ވަނީ ބަންދުކޮށްފައެވެ.

މި ވިއްސާރައާ ގުޅިގެން ހިލަ އާއި ކިސަޑު އަދި ގަސްތައް ޓްރެކް މައްޗަށް ވެއްޓި ބައެއް ފަރުބަދަމަތީ ސަރަހައްދުތަކުގައި ރޭލު ދަތުރުތައްވެސް ވަނީ ހުއްޓިފައެވެ. އަދި ބައެއް ސަރަހައްދުތަކުގައި ފެންބޮޑުވުމުގެ ސަބަބުން ޓްރެކްތަކުގައިވެސް ވަނީ ފެންބޮޑުވެފައެވެ.

އެ ސެންޓަރުން ބުނީ މޫސުން ގޯސްވުމުގެ ސަބަބުން މިހާތަނަށް 4،000 އާއިލާއަށް އަސަރުކޮށްފައިވާ ކަމަށެވެ.

ލަންކާއަށް މޫސުން ގޯސްފައިވާއިރު، ކުރިއަށް އޮތް 24 ގަޑިއިރުވެސް ބޯކޮށް ވާރޭ ވެހޭނެ ކަަމަށް އެ ގައުމުގެ މޫސުމާއި ބެހޭ ގައުމީ އިދާރާއިން ލަފާ ކުރެއެވެ.