ސްރީލަންކާގެ ނުވަރަލިޔާއަށް ދިޔަ ދިވެހި އާއިލާއެއްގެ ޚަބަރު ނުވެގެން ހޯދަން ފަށައިފިއެވެ.

ސްރީލަންކާގައި ހުންނަ ދިވެހި ރާއްޖޭގެ އެމްބަސީއިން މައުލޫމާތު ހާމަކޮށްފައިވާ ގޮތުގައި ނުވަރަލިޔާއަށް ޗުއްޓީއަކަށް ގޮސް އުޅޭ ދިވެހި އާއިލާއަކާ ނުގުޅިގެން ވަނީ ރިޕޯޓް ކޮށްފައެވެ. އެ އާއިލާގައި ހިމެނެނީ ދިވެހި ފިރިހެނަކާއި ކުޑަކުއްޖެއްގެ އިތުރުން ލަންކާ އަންހެނެއް ކަމަށް އެމްބަސީން ބުންޏެވެ.

އެ އާއިލާއާއި ނުގުޅިގެން މާލެއިން ރިޕޯޓެއް ކޮށްފައިވާއިރު އެމްބަސީއިން މިހާތަނަށް ކުރި މަސައްކަތުން ވެސް އެ މީހުންނާ އަދި ގުޅޭގޮތް ނުވާ ކަމަށް ވެސް ބުންޏެވެ.

ސްރީލަންކާގައި މިވަގުތު 1800 އެއްހާ ދިވެހިން ދިރިއުޅެމުން އަންނަ ކަމަށް އެމްބަސީއިން މައުލޫމާތު ދެއެވެ. އޭގެ ތެރެއިން އެ އާއިލާ ފިޔަވާ އެހެން ބަޔަކަށް ގެއްލުމެއްވެގެން މިހާތަނަށް ރިޕޯޓް ކޮށްފައެއް ނުވެއެވެ.

ލަންކާއަށް މިހާރު ކުރަމުންދާ ވިއްސާރައާއި ގުޅިގެން 56 މީހުން މިހާތަނަށް މަރުވެފައިވާއިރު ބޮޑެތި ގެއްލުންތަކެއް ލިބިފައިވެއެވެ.

ގަދަވަޔާއެކު ވާރޭވެހެމުން އަންނައިރު ހިޔާވަހިތަނެއްގައި ތިބުމަށާއި ރައްކާތެރި ސަރަހައްދުތަކުގައި ތިބުމަށް ހައިކޮމިޝަނުން ވަނީ އިލްތިމާސްކޮށްފައެވެ.