ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރު (އެމްޑީ)ގެ މަގާމުން އިބްރާހިމް ނަސްރީން އިސްތިއުފާ ދީފިއެވެ.

މިއީ މި ސަރުކާރުގައި ޕީއެސްއެމްގެ އެމްޑީކަމުން އިސްތިއުފާ ދެއްވި ތިން ވަނަ ބޭފުޅާއެވެ.

މައުލޫމާތު ލިބިފައިވާ ގޮތުގައި ނަސްރީނު ވަނީ މިއަދު ޕީއެސްއެމްގެ ބޯޑު މީޓިންއެއް ކުރިއަސް ދަނިކޮށް މީޓިންގައި އިންނަވާ އިސްތިުފާ ދެއްވާފައެވެ. ނަމަވެސް އިސްތިއުފާ ދެއްވި ސަބަބެއް އަދި ހާމަކުރައްވާފައިނުވެއެވެ.

މި ސަރުކާރުގައި ފަރސްޓު ލޭޑީ މެޑަމް ސާޖިދާ މުހައްމަދު ނުފޫޒު ދައުލަތުގެ މީޑިޔާއަށް ފޯރަމުންދާ ކަމުގެ އަޑުތައް ވަރަށް ބޮޑަށް ގަދަވެފައިވެއެވެ.

ޕީއެސްއެމްގެ އެމްޑީއަކަށް މި ސަރުކާރުގައި އެންމެ ފުރަތަމަ ހުންނެވީ ޒީނާ ޒާހިރުއެވެ. ޒީނާގެ އިސްތިައުފާއަށް ފަހު މުހައްމަދު ސައީދު އެ ކުންފުނީގެ އެމްޑީކަމަށް ހަމަ ޖެއްސުމުން ކުޑަ ދުވަސްކޮޅެއްގެ ތެރޭގައި ސައީދުވެސް ވަނީ ސިއްހީ ހާލު ތަންނުދޭތީ މަގާމުން އިސްތިއުފާ ދެނީ ކަމަށް ހާމަކޮށް އިސްތިއުފާ ދެއްވާފައެވެ. ސައީދުގެ އިސްތިއުފާއަށް ފަހު ނަސްރީނު އެ މަގާމަށް އައްޔަންކުރީ 2024، ޑިސެމްބަރު މަހުގެ ތެރޭގައެވެ.

ނަސްރިޏު ވަނީ ޕީއެސްއެމްގެ ޗީފް ކޮމާޝަލް އޮފިސަރުގެ މަގާމު ވެސް އަދާކުރައްވާފައެވެ. ނަސްރީނަކީ ޕީއެސްއެމްގައި 20 އަހަރަށް ވުރެ ގިނަ ދުވަހު ހިދުމަތް ކުރެއްވި ބޭފުޅެކެވެ.