ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދުގެ މައްޗަށް ކޮށްފައިވާ ތުހުމަތުތަކާ ގުޅިގެން، އޭނާގެ މައްޗަށް ސަރުކާރުން "ފްރޭމް" ކުރަމުންދާ ކަމަށް ބާރު ލިބޭ ވާހަކަތަކެއް ފެންމަތިވެއްޖެއެވެ.
އިމިގްރޭޝަންގެ އިންޓެލިޖެންސް ޑިޕާޓްމަންޓްގެ ހެޑް މުޙައްމަދު ޝިފާން، ކްރިމިނަލް ކޯޓުގައި މިއަދު ދެއްވި ބަޔާނަކުން މިކަމަށް އިތުރަށް ބާރު ލިބިފައިވާ ކަމަށް ގިނަ ބަޔަކު ދެކެއެވެ. ޝިފާން ކޯޓުގައި ވިދާޅުވެފައިވަނީ، ގަވާއިދާ ޚިލާފަށް އެއްވެސް އިރުޝާދެއް އިމިގްރޭޝަންގެ އެއްވެސް އޮފިސަރަކަށް ނުދެވޭނެ ކަމަށް ޝަމްޢާން އަބަދުވެސް އަންގަވާ ކަމަށެވެ. މިއީ ޝަމްޢާންގެ ދުވަސްވަރު އިމިގްރޭޝަންގައި އޮތް ސިޔާސަތެއް ކަމަށް ޝިފާންގެ ބަޔާނުން ދޭހަވެއެވެ.
ޝަމްޢާން މަގާމުން ވަކިކޮށް، ހައްޔަރުކޮށްފައިވަނީ މި އަހަރުގެ މާޗު މަހުގެ ތެރޭގައެވެ. އޭނާގެ މައްޗަށް ތުހުމަތުކުރެވޭ މައްސަލައަކީ، އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށް ފަހު، އިމިގްރޭޝަންގެ މުވައްޒަފުންތަކަކާ ގުޅިގެން އެ މީހާގެ އަތުން 500،000ރ. ހޯދައިގެން ޝަމްޢާންގެ ގެއަށް ގެންދިޔަ ކަމުގެ ތުހުމަތެވެ.
ނަމަވެސް، ޝިފާންގެ މިއަދުގެ ބަޔާނާއި، ޝަމްޢާންގެ މައްޗަށް ތުހުމަތު ކުރެވޭ ކޮރަޕްޝަންގެ މައްސަލައާ ދެމެދު ވަރަށް ބޮޑު ތަފާތެއް ހުރިކަން ގިނަ ބަޔަކު ފާހަގަކުރެއެވެ. ބައެއް ސިޔާސީ މުރާސިލުންނާއި އާންމުން ދެކޭ ގޮތުގައި، ޝަމްޢާންގެ މައްޗަށް މިފަދަ ބޮޑެތި ތުހުމަތުތަކެއް ކުރެވިފައިވަނީ އޭނާއަށް ވަކި ސިޔާސީ ފަރާތަކުން ނުފޫޒު ފޯރުވައިގެން ނުވަތަ ފްރޭމްކޮށްގެން ކަމަށް ބެލެވެއެވެ. ޚާއްސަކޮށް، ގަވާއިދާ ޚިލާފު ކަންކަމަށް ފުރުސަތު ނުދިނުމަށް ޝަމްޢާން ދިން އިރުޝާދުތަކާ ޚިލާފަށް އޭނާގެ މައްޗަށް މިފަދަ ތުހުމަތުތަކެއް ކުރެވުމަކީ، ސުވާލު އުފެދޭ ކަމެއް ކަމަށް އެމީހުން ބުނެއެވެ.
މިކަމާ ގުޅިގެން ސަރުކާރުގެ ފަރާތުން ރަސްމީ ބަހެއް އަދި ދީފައިނުވާއިރު، މި މައްސަލަ ކްރިމިނަލް ކޯޓުގައި ކުރިއަށް ދިއުމުން އިތުރު ތަފްސީލުތައް ފެންމަތިވެގެންދާނެ ކަމަށް ބެލެވެއެވެ.
މައްސަލާގައި ޝަމްއާންގެ އިތުރުން އިތުރު ބައެއްގެ މައްޗަށް ވެސް ދައުވާކުރި އެވެ. އެއީ މ. ހަޒާރީވިލާ، އަހުމަދު ލައްސާންގެ އިތުރުން ގ. ހެޕީސައިޑް އަހުމަދު ޝަހެޝަން އާއި އެގޭ އިބްރާހިމް އަހުމަދާއި ތ. ބުރުނީ މޫނިމާގޭ، އަހުމަދު އަލްސަން އިސްމާއިލްގެ މައްޗަށެވެ.
އޭގެ ތެރެއިން ލައްސާން އަދި އަލްސަންއާ އެކު ދައުލަތުން އިއުތިރާފްގެ އެއްބަސްވުމެއް ހެދި އެވެ. އަލްސަންގެ މައްޗަށް މިއަދު ވަނީ ދެ މަހާއި ތިން ދުވަހުގެ ޖަލު ހުކުމެއް އަދި 45،000ރ. ޖޫރިމަނާގެ އަދަބު ކަނޑައަޅައިފަ އެވެ.