ރައްޔިތުން އިންތިހާބުކޮށްފައިވާ ކައުންސިލަރުންގެ މުސާރަ އުނިކޮށް, ސަސްޕެންޑްކޮށް ކައުންސިލްތަކުގެ ބާރު ކަނޑުވާލުމުގެ ފިކުރު ރައީސް ޑރ. މުހައްމަދު މުއިއްޒުގެ ސަރުކާރުން އިއާދަކުރަމުންދާ ކަމަށް އެމްޑީޕީން ބުނެފިއެވެ.
އިދިކޮޅު އެމްޑީޕީގެ މެމްބަރުންގެ މައްޗަށް އެކުލެވޭ ނ. ކެނދިކުޅުދޫ ކައުންސިލުން ނެރުނު ބަޔާނަކާއި ގުޅިގެން ލޯކަލްސް ގަވަމެންޓް އޮތޯރިޓީ (އެލްޖޭއޭ) އިން ވަނީ އެ ބަޔާން ބާތިލް ކުރުމަށް އަންގާފައެވެ.
އެކަމާއި ގުޅިގެން އެމްޑީޕީން ނެރުނު ބަޔާނެއްގައި ބުނީ، އެ ކައުންސިލަށް އެލްޖީއޭއިން އެންގި އެންގުން އެ ޕާޓީން ކުށްވެރިކުރާ ކަަމަށެވެ.
އެ ބަޔާނުގައި ބުނެފައި ވަނީ ރައީސް ޑރ. މުއިއްޒުގެ ސަރުކާރުން ކައުންސިލްތަކާ ބެހޭ ވުޒާރާއެއް އުފައްދަވާކަމަށް އިއުލާނުކުރުމާ ހިސާބުންވެސް އެ ޕާޓީން ފާޅުކުރި ކަންބޮޑުވުމަކީ އެމަނިކުފާނުގެ އެ ނިންމެވުމަކީ ކައުންސިލްތަކަށް ނުފޫޒު ފޯރުވާ އެ ކައުންސިލްތަކަށް އެ ޕާޓީގެ ސަރުކާރުން ދިން ގާނޫނީ ބާރުވެރިކަން ކަނޑުވާލުމަށްޓަކައި ކުރެއްވި ކަމެއްގެ ގޮތުގައި ކަމަށެވެ.
