ސްރީލަންކާ އަށް އެރި ތޫފާން ދީތުވާގެ ސަބަބުން ލިބުނު ގެއްލުންތަކާ ގުޅިގެން އެ ގައުމުގެ ރައްޔިތުންނަށް އެހީތެރިވުމަށް ދިވެހި ރާއްޖޭން ވެދިން އެހީއަށް ޝުކުރު އަދާކުރުމަށް ރާއްޖޭގައި ތިބި ސްރީލަންކާގެ ރައްޔިތުން އެއްވުމެއް ބާއްވައިފިއެވެ.
މި އެއްވުން ބާއްވާފައި ވަނީ މިއަދު ހަވީރު މާލޭގެ ޓޯ ޔާޑު ކުރިމަތީގައިއެވެ. އެއްވުމުގައި ގިނަ އަދަދެއްގެ ސްރީލަންކާ ރައްޔިތުން ވަނީ ބައިވެރިވެފައިއެވެ.
އެ ރައްޔިތުން ވަނީ ދިވެހި ދިދަ ހިފައިގެން، "ތެންކިއު މޯލްޑިވްސް" ޖަހާފައި ހުރި ހެޑް-ބޭންޑު އަދި އެކި ފޮޓޯފްރޭމް ތަކާއެކު އެސަރަހައްދުގައި ހަރަކާތްތެރިވެފައިއެވެ.
އެއްވުމުގެ ބައިވެރިން ބުނި ގޮތުގައި ތޫފާނުގެ ސަބަބުން ސްރީލަންކާއަށް އެންމެ ބޮޑު އެހީއެއް، ހީވެސް ނުކުރާ ވަރުގެ އެހީއެއް ރާއްޖެއިން ވެފައިވާކަމަށެވެ. އަދި މިކަމުގެ އަގު އަދާކުރަން ޖެހިއްޖެ ހާލަތެއްގައި ސްރީލަންކާގެ ރައްޔިތުން އަބަދުވެސް އެތިބީ ރާއްޖެއަށް އެހީވާން ތައްޔާރަށް ކަމަށްވެސް އެއްވުމުގެ ބައިވެރިން ބުންޏެވެ.
ސްރީ ލަންކާއަށް ދިމާވި މި ކާރިސާގައި، ސްރީލަންކާގެ އެތައް ބަޔަކަށް ގެއްލުންތަކެއް ލިބި، ފުރާނަ ވެސް ގެއްލުނުއިރު، ރާއްޖެއިން ވަނީ އެހީތެރިކަމުގެ އަތް ދިގުކޮށްފައެވެ. ރާއްޖޭގެ ސަރުކާރާއި، ކުންފުނިތަކާއި، އާންމު ފަރުދުން ވެސް މި ކެމްޕޭނުގައި ބައިވެރިވެފައިވެއެވެ.
ފޯރުކޮށްދެވުނު މުހިންމު އެހީތެރިކަމުގެ ގޮތުގަި ފާހަގަކޮށްފައިވާ ކަންކަން:
މީސް މީޑިއާގައި މިހާރު ދައުރުވަމުންދާ ޕޯސްޓްތަކުން ފެންނަ ގޮތުގައި ލަންކާގެ ގިނަ ފަރާތްތަކުން ދަނީ ރާއްޖެއަށް ޝުކުރު އަދާކޮށް، "ރާއްޖެ ބޭނުންވާ ވަގުތު އަހަރެމެން އެކަން އަނބުރާ ދައްކާނަން" މި ޝުޢޫރު ފާޅުކުރަމުންނެވެ. ލަންކާގެ ރައްޔިތުން މިހާރު މިހާ ގިނައިން މިފަދަ ޕޯސްޓްތައް ކުރަމުންދާއިރު، ދިވެހިން ދަނީ "ދިވެހިން ސިލޯނާއި އެކު" މި ހޭޝްޓެގް ފަތުރަމުންނެވެ.
