ޣައްޒާގައި ހިނގަމުންދާ ނަސްލު ނައްތާލުމުގެ ޖަރީމާތަކާ ގުޅިގެން، ތުރުކީން ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ ވެސް ހިމެނޭހެން، އެގައުމުގެ 37 އިސް އޮފިޝަލަކު ހައްޔަރު ކުރުމުގެ އަމުރު ނެރެފައިވާ ކަމަށް "މީޑިލް އީސްޓް އައި"ގެ ރިޕޯޓެއްގައި ބުނެފިއެވެ.
މި އަމުރުތައް ނެރެފައިވަނީ ޣައްޒާގައި ސަހްޔޫނީން ހިންގާފައިވާ އިންސާނިއްޔަތާ ޚިލާފު އަމަލުތަކަށް އެ އޮފިޝަލުން ޒިންމާ ނަގަން ޖެހޭނެ ކަމަށް ތުރުކީން ބުނަމުންދާ ދަނޑިވަޅެއްގައެވެ.
ތުރުކީގެ ކަމާބެހޭ ފަރާތްތަކުން ނެރެފައިވާ މި އަމުރުތަކަކީ، ޣައްޒާގައި ހިންގާފައިވާ ނަސްލު ނައްތާލުމުގެ ތުހުމަތުތަކާ ގުޅިގެން، އެކަމުގައި ހިމެނޭ ސަހްޔޫނީންގެ ވެރިންނާމެދު ފިޔަވަޅު އެޅުމުގެ ގޮތުން އަޅާފައިވާ ފިޔަވަޅެކެވެ. މި އަމުރުތަކުގައި ނަން ފާހަގަކޮށްފައިވާ މީހުންގެ ތެރޭގައި އެ ގައުމުގެ ޑިފެންސް މިނިސްޓަރު އިސްރާއީލް ކަޓްޒް އަދި ނޭޝަނަލް ސެކިއުރިޓީ މިނިސްޓަރު އިޓަމާ ބެން ގްވިރް ވެސް ހިމެނެއެވެ. މި ދެ މީހުންނަކީވެސް ސަހްޔޫނީންގެ ސަލާމަތީ ކަންކަމާއި އަސްކަރީ ނިންމުންތައް ނިންމުމުގައި މުހިއްމު ރޯލެއް އަދާކުރައްވާ މީހުންނެވެ.
ސަހްޔޫނީންގެ އަސްކަރީ އޮޕަރޭޝަންތަކަށް ތުރުކީން ފެށުނީއްސުރެ ވަނީ ވަރަށް ބޮޑަށް ފާޑުކިޔާފައެވެ. މިފަދަ ހައްޔަރުގެ އަމުރުތައް ނެރުމުގެ ސަބަބުން، މިހާރުވެސް ދެގައުމުގެ ދެމެދުގައި އޮތް ގުޅުމަށް އިތުރު ހީނަރުކަމެއް އިތުރުވެގެންދާނެ ކަމަށް ބެލެވެއެވެ.
މި އަމުރުތަކަށް ސަހްޔޫނީން ރައްދުދޭނެ ގޮތެއް އަދި ސާފު ނުވާއިރު، ބައިނަލްއަޤްވާމީ ގުޅުންތަކުގެ ތަޖުރިބާކާރުން ބުނާ ގޮތުގައި، މި އަމުރުތަކަކީ ގިނައިން ރަމްޒީ އަމުރުތަކެކެވެ. އެއީ، ސަހްޔޫނީންގެ ތެރޭގައި މިފަދަ އަމުރުތައް ތަންފީޒު ކުރުމުގެ ގާބިލުކަން ނެތުމުންނެވެ. ނަމަވެސް، މި ފިޔަވަޅަކީ ސަހްޔޫނީންގެ އަމަލުތަކާ ދެކޮޅަށް ތުރުކީން ވަރުގަދައަށް އަޑުއުފުލާ ކަމެއްކަން ހާމަކޮށްދޭ އަދި ބައިނަލްއަޤްވާމީ މުޖުތަމައަށް ގޮވާލާފައިވާ މުހިއްމު މެސެޖެކެވެ.
