ޣައްޒާގައި އިސްރާއީލުން ހިންގަމުންދާ ނަސްލު ނައްތާލުމުގެ އަމަލުތަކާ ދެކޮޅަށް، ދެކުނު އެފްރިކާއިން އިންޓަނޭޝަނަލް ކޯޓް އޮފް ޖަސްޓިސް (އައި.ސީ.ޖޭ) އަށް ހުށަހަޅާފައިވާ މައްސަލައިގެ ތެރެއަށް ވަނުމަށް ނެދަލެންޑްސް އާއި އައިސްލޭންޑުން ރަސްމީކޮށް ހުށަހަޅައިފިއެވެ.
މި ދެ ގައުމުން މި މައްސަލައިގެ ތެރެއަށް ވަނުމަށް (އިންޓަރވީން ކުރުމަށް) ހުށަހެޅީ 1948 ވަނަ އަހަރުގެ "ޖެނޮސައިޑް ކޮންވެންޝަން" ނުވަތަ ނަސްލު ނައްތާލުމުގެ ކުށް ހުއްޓުވުމާއި އެކަމަށް އަދަބު ދިނުމާބެހޭ މުއާހަދާގެ ދަށުންނެވެ. މި ހުށަހެޅުމާއެކު، އިސްރާއީލުން ޣައްޒާގައި ހިންގަމުންދާ އަސްކަރީ ހަރަކާތްތަކަކީ އެ މުއާހަދާއާ ހިލާފު އަމަލުތަކެއްކަން ސާބިތުކުރުމަށް ކުރެވޭ މަސައްކަތުގައި މި ދެ ގައުމުގެ ބައިވެރިވުން ލިބިގެންދާނެއެވެ.
ނެދަލެންޑްސް އާއި އައިސްލޭންޑުން ބުނެފައިވަނީ، މި މައްސަލައިގައި ބައިވެރިވަނީ ބައިނަލްއަގުވާމީ ގާނޫނުތައް ނެގެހެއްޓުމަށާއި، ނަސްލު ނައްތާލުމުގެ އަމަލުތައް ހުއްޓުވުމަށް އޮތް ބައިނަލްއަޤްވާމީ ޒިންމާގެ ދަށުން ކަމަށެވެ.
ދެކުނު އެފްރިކާއިން މިދިޔަ އަހަރުގެ ޑިސެމްބަރު މަހު ހުށަހެޅި މި މައްސަލައިގައި މިހާތަނަށް ގިނަ އަދަދެއްގެ ގައުމުތަކަކުން ވަނީ ބައިވެރިވެފައެވެ. މީގެ ތެރޭގައި ތުރުކީ، ސްޕެއިން، މެކްސިކޯ، ކޮލަމްބިއާ، ނިކަރާގުއާ އަދި ފަލަސްތީނު ހިމެނެއެވެ.
އައި.ސީ.ޖޭ އިން މިހާތަނަށް ވަނީ ޣައްޒާގެ ރަފާހަށް ދެމުންދާ ހަމަލާތައް ވަގުތުން ހުއްޓާލުމަށާއި، އިންސާނީ އެހީ ފޯރުކޮށްދިނުމަށް ހުރަސްނޭޅުމަށް އިސްރާއީލުގެ މައްޗަށް އަމުރުކޮށްފައެވެ. ނަމަވެސް އިސްރާއީލުން ދަނީ އެ އަމުރުތަކަށް ގޮންޖަހައި، ޣައްޒާގެ އާންމުންނަށް އަމާޒުކޮށް ހަމަލާތައް ދެމުންނެވެ.
