މަޖިލިސް މެމްބަރުންނަކީ ސަރުކާރު ބޭރު ދަވާދުލާ ވަރުނީސްކުރަން ތިބޭ ބަޔަކަށް ވެއްޖެ ކަމަށް ވިދާޅުވެ ކެންދޫދާއިރާގެ ކުރީގެ މަޖިލިސް މެމްބަރު އަލްއުސްތާޛު އަލީ ހުސެއިންގެ ފާޑުކިޔުން ރައްޔިތުންގެ މަޖިލީހަށް އަމާޒުކުރައްވަައިފިއެވެ.

އަލީ މިފަދައިން ވިދާޅުވީ ޗެނަލް13ގެ ނިއުސް ޓޯކު ޕްރޮގްރާމުގައި ވާހަކަ ދައްކަވަމުންނެވެ.

އެގޮތުން ޕާޓީއިން ވަކި ވެއްޖެ ނަމަ ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް ގާނޫނަސް އިސްލާހު ގެނެސް ފާސްކުރި ގާނޫނުގެ ދުސްތޫރީ މައްސަލަ ރައީސުލްޖުމްހޫރިއްޔާގެ ނުފޫޒުން ސުޕްރީމު ކޯޓުގައި ޕާކުކުރުވާފައި އޮތްއޮތުމަށް ނަޒަރު ހިންގަވާލައްވާމުން އަލީ ވިދާޅުވީ، މަޖިލިސް މެމްބަރުންނަކީ ސަރުކާރު ޒިންމާދާރު ކުރުވަން ތިބޭ ބައެއްގެ ގޮތުގައި ގާނޫނުގައި އޮތް ނަމަވެސް މިއަދު މަޖިލީހަކީ ރައީސްގެ ރަބަރު ތައްގަޑެއްގެ ގޮތުގައި ފެންނަމުންދާ ކަމަށެވެ.

އެގޮތުން ތިންބާރު ވަކިވެފައިވާ ރިޔާސީ ނިޒާމެއްގެ ގޮތުގައި މިއަދު ވެރިކަން ކުރަމުން ދިޔަ ނަމަވެސް ފެންނަނީ ރިޔާސީ ރަސްކަމެއް ކަަމަށާ އެގޮތުން ހުރިހާ ބާރެއް މިއަދު ރައީސުލްޖުމްހުރިއްޔާގެ މުށުތެރެއަށް ކަހާލާފައިވާ ކަމަށްވެސް އަލީ ތުހުމަތުކުރައްވާފައިވެއެވެ.

ރައްޔިތުން ހޮވާ މަޖިލިސް މެމްބަރަކު، މެމްބަރު ކަމުން ވަކިކުރުމުގެ ބާރު ސިޔާސީ ޕާޓީތަކަށް ދިނީ ރައްޔިތުންގެ ނިންމުމަށް އިހުތިރާމް ކުރުވަން ކަމަށް ވާނަމަ ގާނޫނަށް ގެނައި އިސްލާހަކީ ރައްޔިތުން ބޭނުންވާ ގޮތްތޯ ބަލަން ފެންނަ ނުފެންނަ ވޯޓަކަށް ދާން ވެސް އަލީ ވަނީ ސަރުކާރަށް ގޮވާލާފައެވެ.

އަލީ އިތުރަށް ވިދާޅުވީ ދުސްތުރީ ބޮޑެތި ބަދަލުތަކެއް ގެންނަން ޖެހޭ ކަމަށާ ސިޔާސީ ހުރިހާ އެންމެން އެއް މޭޒެއްގެ ދޮށަށް ޖަމާވެ އެކަންކަމާ މެދު މަޝްވަރާ ކުރަން ޖެހޭ ކަމަށެވެ.