ފުވައްމުލަކު ސިޓީ ގެ މައި ފެން ރައްކާކުރާ ޓޭންކުން ފެން ލީކު ވާން ފަށައިފިއެވެ.
ޗެނަލް 13 އަށް މައުލޫމާތު ލިބުނު ގޮތުގައި މިކަން ދިމާވީ، ހޮޅި އެއް ފަޅައިގެން ދިޔުމުގެ ސަބަބުންނެވެ. މިކަން ހައްލުކުރުމަށް މިހާރު އަންނަނީ މަސައްކަތް ކުރަމުންނެވެ.
މިކަމާ ގުޅިގެން އެރަށުގެ ކައުންސިލުން އަދި ވަކި އެއްޗެއް ބުނެފައިއެއް ނުވެއެވެ.
ފުވައްމުލަކު ސިޓީއަށް ދިމާވި ފެނުގެ ކާރިސާއަށް ފަހު އޭރު ގެނެވުނު ވަގުތީ ހައްލަށް ފަހު އަދި މިހާތަނަށް އެއްވެސް ކުރިއެރުމެއް ނުލިބޭކަމަށް އެރަށުގެ ރައްޔިތުން ވަނީ މައުލޫމާތު ދީފައިއެވެ.
އެ ސިޓީގެ ރައްޔިތުން ތަގައްޔަރުވެފައިވާ ފެން ބޭނުން ކުރަމުން އަންނަތާ އެތައް މަހެއް ވީފަހުން މިދިޔަ މަހު ވަނީ ފެނުގެ ޚިދުމަތް މެދުކަނޑާލާފައިއެވެ.
އަދި ފެން ޓްރީޓު ކުރުމަށް ފަހު ފެން އަލު ދޫކޮށްފައި ވަނީ މިކަމަށް ފުރިހަމަ ހައްލެއް ނުގެނެސްއެވެ.
