ރައްޔިތުންގެ މަޖިލީހުގެ އިންތިހާބުގައި ވޯޓުދިނުމުގެ ހައްގު ލިބިފައިވާ މީހުންގެ ރަޖިސްޓަރީ އާންމުކޮށް ޝަކުވާއަށް އިލެކްޝަންސް ކޮމިޝަނުން ހުޅުވާލައިފިއެވެ.

އިންތިހާބުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް އިތުރުވާ ފަރާތްތަކުގެ ލިސްޓު އީސީ އިން މިއަދު ވަނީ އާންމުކޮށްފައެވެ. އީސީއިން ކުރި އިއުލާނެއްގައި ބުނެފައިވަނީ އެ ލިސްޓު ދިވެހި ސަރުކާރުގެ ގެޒެޓް އެ ކޮމިޝަނުގެ ވެބްސައިޓް މާލެ ފިޔަވައި މީހުން ދިރިއުޅޭ ކޮންމެ ރަށެއްގެ ރަށު ކައުންސިލް އިދާރާ، ކުޅުދުއްފުށި ސިޓީގެ ކައުންސިލް އިދާރާ، އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުގައި އާންމުކޮށް ފެންނަން ހުންނާނެ ކަމަށެވެ.

މީގެއިތުރުން VR ޖަހާފައި ހުސްޖާގައެއް ބޭއްވުމަށްފަހު އައިޑީކާޑު ނަމްބަރު ޖެއްސެވުމަށްފަހު 1414 އަށް އެސްއެމްއެސް ކުރުމުން އެ މީހަކު ރަޖިސްޓްރީވެފައިވާ ތަނެއް ބެލޭނެ ކަމަށް ވެސް އީސީން ވަނީ ބުނެފައެވެ.

ލިސްޓަށް ޝަކުވާ ހުށަހަޅުމަށް ހުޅުވާލައިފާވަނީ އަންނަ ބުރާސްފަތި ދުވަހުގެ ނިޔަލަށް، ރަސްމީ ބަންދު ނޫން ކޮންމެ ދުވަހަކު ހެނދުނު 08:30 އިން މެންދުރުފަހު 03:00އަށް ކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ.

ޝަކުވާ ބަލައިގަތުމަށް ހަމަޖެހިފައިވަނީ މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީ އަދި ފުވައްމުލަކު ސިޓީގެ ކައުންސިލް އިދާރާއިންނެވެ. މާލޭގައި ނަމަ، އިންތިހާބާ ބެހޭ މަރުކަޒު (ދަރުބާރުގެ) އިން ޝަކުވާ ބަލައިގަންނަނާނެއެވެ.

ޝަކުވާ ފޯމު ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެ ކަމަށް ވެސް އެ ކޮމިޝަނުން ވަނީ ބުނެފައެވެ.

މީގެ ކުރިން އީސީން މި އިންތިހާބު ބާއްވަން ނިންމާފައި ވަނީ މާރިޗް މަހުގެ 17 ވަނަ ދުވަހެވެ. އެހެންނަމަވެސް މަޖިލީހުގެ އިންތިހާބު ފަސްކުރުމުގެ ބިލު ރައީސް، ޑރ މުއިއްޒު ތަސްދީގު ކުރެއްވުމާއެކު އީސީއިން ވަނީ ރޯދައިގެ ފަހަށް އޭޕްރިލް މަހުގެ 21 ވަނަ ދުވަހު އިންތިހާބު ބާއްވަން ނިންމައިފައެވެ.