ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާއި މުޒާހަރާތަކާއި ގުޅިގެން އިންޑިއާގެ އުނދަގޫ ބޮޑުވެ، ބަންގާޅުގެ ޖެންޒީ މުޒާހަރާތައް އަނެއްކާވެސް ހޫނުވެފައިވާ ކަމަށް ރިޕޯޓްތަކުން ބުނެފިއެވެ.
ބަންގްލަދޭޝްގެ ދަރިވަރުން ވަނީ މުޅި ގައުމުގައި ބޮޑެތި މުޒާހަރާތަކެއް ފަށާފައެވެ. މި މުޒާހަރާތަކުގެ މައިގަނޑު ސަބަބަކީ، ހިނގަމުންދާ ހަމަނުޖެހުންތަކުގެ ފަހަތުގައި އިންޑިއާގެ އަތެއްވާ ކަމަށް އެ ދަރިވަރުން ތުހުމަތުކުރުމެވެ. ދަރިވަރުން ވަނީ އިންޑިއާ ހައި ކޮމިޝަންގެ ބޭރުގައި ހިމެނޭ ގޮތަށް އެކި ސަރަޙައްދުތަކަށް އެއްވެ، އެމީހުންގެ ރުޅިވެރިކަމާއި ޝަކުވާތައް ފާޅުކޮށްފައެވެ.
މުޒާހަރާގެ ބައިވެރިން ބުނާގޮތުގައި، ޚާއްސަކޮށް ބަންގްލަދޭޝްގެ ސިޔާސީ ގޮތުން ނާޒުކު ދުވަސްވަރެއްގައި، އިންޑިއާއިން ދަނީ އެ ގައުމުގެ ހާލަތުގެ ނާޖާއިޒު ފައިދާ ނަގަމުންނެވެ. ބޭރުގެ ފަރާތްތަކުގެ ތަދައްޚުލުވުމުގެ ސަބަބުން ގައުމުގެ ހާލަތު އިތުރަށް ގޯސްވެ، ގައުމުގެ ސުލްހަ އާއި ޑިމޮކްރަސީއަށް ނޭދެވޭ އަސަރުތަކެއް ކުރަމުންދާކަމަށް ގިނަ ދަރިވަރުން ދަނީ ބުނަމުންނެވެ.
މުޒާހަރާގެ ބައިވެރިންގެ މައިގަނޑު އެއް ޑިމާންޑަކީ ކުރީގެ ސަރުކާރުގެ ލީޑަރު ޝެއިޚް ހަސީނާ އެ ގައުމާއި ހަވާލުކުރުމެވެ. އެމީހުން ގޮވާލަނީ ދާދި ފަހުން ބަންގްލްދޭޝްގެ ކޯޓުން ނިންމާފައިވާ ނިންމުންތަކާ ގުޅިގެން ބަންގްލަދޭޝްގައި އިންސާފު ހޯދުމަށްޓަކައި، ކުރީގެ ބޮޑުވަޒީރު ޝެއިޚް ހަސީނާ އެނބުރި ވަޑައިގަތުމަށެވެ.
މީގެ އިތުރުން، އިންތިހާބުގެ ކުރިން އިންޑިއާގެ ޖާސޫސީ އިދާރާތަކުން ހަމަނުޖެހުން ހިންގާ ކަމަށް ބައެއް މުޒާހަރާގެ ބައިވެރިން ވަނީ ތުހުމަތުކޮށްފައެވެ. މި ވާހަކަތައް މިނިވަންކަމާއެކު ޔަޤީން ނުކުރެވުނު ނަމަވެސް، މުޒާހަރާގެ ބައިވެރިންގެ މެދުގައި އާންމުންގެ ރުޅިވެރިކަމާއި އިތުބާރު ނެތްކަން ވަނީ އިތުރުވެފައެވެ.
މިއާއި އެކު ބަންގްލަދޭޝްގެ ޖެންޒީ ލީޑަރު ކަމަށްވާ ޝާރިގް އުމަރް ހާދީ މަރާލުމުގެ ފަހަތުގައިވެސް ވަނީ އިންޑިއާގެ ޖާސޫސީ އިދާރާގެ އަތެއް ކަމަށްވެސް މި ފަރާތްތަކުން އަންނަނީ ތުހުމަތުކުރަމުންނެވެ.
