!މި އަހަރުގެ މިހާތަނަށް މާލެއިން އެކަނި 1،425 ވައްކަމުގެ މައްސަލަ ރިޕޯޓުކުރިކަމަށް ފުލުހުންގެ އިދާރާއިން ހާމަކޮށްފިއެވެ.
ފުލުހުން މި ތަފްސީލު ހާމަކޮށްފައި ވަނީ މާލެ އޭރިއާގެ ފުލުހުން ކުރި މަސައްކަތްތަކުގެ ތަފްސީލުދޭން މިއަދު ބޭއްވި ޕްރެސް ކޮންފަރެންސެއްގައި ސުޕާރއިންޓެންޑެންޓް އޮފް ޕޮލިސް އަބްދުﷲ ރަޝީދުއެވެ.
އޭނާ ވިދާޅުވީ މިއަހަރުގެ މިހާތަނަށް މާލެއިން ވަނީ ޖުމްލަ 3،449 މައްސަލަ ރިޕޯޓްކޮށްފައި ކަމަށެވެ. އަދި މީގެ ތެރެއިން 1،425 މައްސަލަ އަކީ ވައްކަމުގެ މައްސަލަކަމަށްވެސް އޭނާ ވިދާޅުވިއެވެ. މިއީ ދުވާލެއްގެ މައްޗައް 4 ވައްކަމުގެ މައްސަލައެވެ.
އިތުރަށް އޭނާ ވިދާޅުވީ ވައްކަމުގެ މައްސަތަކުގައި ގިނައިން ރިޕޯޓުކުރަނީ ސައިކަލާއި ފޯނު ކަމަށެވެ.
ވައްކަމުން ސަލާމަތްވުމަށް އަޅަންވީ ފިޔަވަޅުތައްވެސް ފުލުހުން ވަނީ ކިޔާދީފައިއެވެ. އެގޮތުން އިރުޝާދަކީ ސައިކަލް މަޑިދަށުގައި އަގުބޮޑު އެއްޗިހި ބަހައްޓާފައި ނުދިއުމާއި، ދިގު މުއްދަތަަކަށް ފުރައިގެން ދާ ނަމަ މީހަކާ ސައިކަލް ހަވާލުކޮށްފައި ދިޔުން ހިމެނެއެވެ.
