ޣައްޒާއަށް ދިގުދެމިފައިވާ ޔަހޫދީންގެ ހަނގުރާމަ އާ ދެމެދު އެކި ފަހަރުމަތިން ކުރެވުނު އެއްބަސްވުންތަކާ ޚިލާފަށް، ޣައްޒާއިން އެއްކޮށް ނުފައިބާނެ ކަމަށް ޔަހޫދީ ދައުލަތުން އިއުލާނުކޮށްފިއެވެ. މިކަމުގެ ސަބަބުން، ޣައްޒާގެ ރައްޔިތުންގެ މުސްތަގުބަލާ މެދު އުއްމީދުތައް ފަނޑުވެ، ސަރަހައްދީ ހަމަޖެހުމަށް އިތުރު ބޮޑެތި ގޮންޖެހުންތަކާ ކުރިމަތިލާން ޖެހިފައިވާކަމަށް ބައިނަލްއަގްވާމީ މުޖުތަމަޢުން ދަނީ ބުނަމުންނެވެ. އެއްބަސްވުންތަކާ ޚިލާފުވުމަކީ ދެމެހެއްޓެނިވި ސުލްހައަކަށް ހުރަސް އެޅޭ ކަމެއް ކަމަށް ވެސް ފާހަގަކުރެވެއެވެ.

ޔަހޫދީންގެ ދައުލަތާއި ހަމާސްގެ ދެމެދު އެކި ފަހަރުމަތިން ވަގުތީ އެއްބަސްވުންތައް ކުރެވިފައިވާއިރު، އެ އެއްބަސްވުންތަކުގެ މައިގަނޑު އެއް ނުކުތާއަކީ ޣައްޒާއިން ފައިބައި، ހަނގުރާމަ ހުއްޓާލުމެވެ. މިގޮތުން، ބައިނަލްއަގްވާމީ ފަރާތްތަކުން ވަނީ އެކަމަށް ބާރުއަޅާ، ސުލްހަ ގާއިމުކުރުމަށް މަސައްކަތް ކޮށްފައެވެ. ނަމަވެސް، މިފަހަރު ޔަހޫދީ ދައުލަތުން ހާމަކޮށްފައިވާ ގޮތުންނާއި، ކުރިން ހެދިފައިވާ އެއްބަސްވުންތަކަށް ބީރު ކަންފަތެއް ދިނުމާއި އެކު، ޣައްޒާގެ ރައްޔިތުންނަށް ދިމާވެފައިވާ އިންސާނީ ކާރިސާ އިތުރަށް ގޯސްވެގެންދާނެ ކަމަށް ވަނީ ބެލެވިފައެވެ.

ޔަހޫދީ ދައުލަތުގެ ބޮޑުވަޒީރު ބެންޔަމިން ނެތަންޔާހޫ ވަނީ، ޣައްޒާއިން އެއްވެސް ހާލެއްގައި ނުފައިބާނެ ކަމަށާއި، ހަމާސްގެ ބާރު ނައްތާލުމަށް ކުރާ މަސައްކަތް ހުއްޓާނުލާނެ ކަމަށް ބުނެފައެވެ. މިއީ ސެކިއުރިޓީގެ ނަމުގައި، ޣައްޒާގައި ހިންގާ ހަނގުރާމަ އިތުރަށް ހޫނުކުރުމަށް އެޅި ފިޔަވަޅެއް ކަމަށް ބައިނަލްއަގްވާމީ ބައެއް ތަޖުރިބާކާރުން ދަނީ ސިފަކުރަމުންނެވެ. މިގޮތަށް ޢަމަލުކުރުމަކީ، މެދުއިރުމަތީގެ ސުލްހައަށް ނުރައްކާކޮށް، ސަރަހައްދީ ހަމަނުޖެހުންތައް އިތުރުކުރާނެ ކަމެއް ކަމަށް ވެސް ބެލެވެއެވެ.

ޔަހޫދީންގެ މި ނިންމުމަށް ދުނިޔޭގެ އެކި ކަންކޮޅުތަކުން ވަނީ ހަރުކަށި ބަހުން ކުށްވެރިކޮށްފައެވެ. އެހެންކަމުން، ބައިނަލްއަގްވާމީ ޖަމާޢަތްތަކާއި، އިސްލާމީ ގައުމުތަކުން ދަނީ ޣައްޒާގެ ރައްޔިތުންގެ ހައްގުތައް ރައްކާތެރިކުރުމަށާއި، ޔަހޫދީންގެ ދައުލަތަށް ފިއްތުންތައް ކުރިމަތިކުރުމަށް ގޮވާލަމުންނެވެ. މީގެ އިތުރުން، ޣައްޒާގައި ކުރިއަށްދާ ނަސްލު ނައްތާލުމުގެ ޢަމަލުތައް ހުއްޓާލައި، އިންސާނީ އެހީ ފޯރުކޮށްދިނުމަށް ވެސް ދަނީ ގޮވާލަމުންނެވެ.

މިކަމުގެ ސަބަބުން ޣައްޒާގައި ދިރިއުޅޭ މިލިއަނަށް ވުރެ ގިނަ ރައްޔިތުންނަށް އޮތް ހާލަތު ވަނީ އިތުރަށް ގޯސްވެފައެވެ. ކާބޯތަކެތީގެ ދަތިކަމާއި، ސިއްހީ ހިދުމަތްތައް ނުލިބުމުގެ ސަބަބުން މަރުވާ މީހުންގެ އަދަދު ދަނީ އިތުރުވަމުންނެވެ. މިފަދަ ނާޒުކު ހާލަތެއްގައި ވެސް ޔަހޫދީންގެ ދައުލަތުން އެއްބަސްވުންތަކަށް ބޯނުލެނބުމަކީ، ފަލަސްޠީނު މީހުންނަށް ކުރިމަތިވެފައިވާ ގޮންޖެހުންތަކުގެ ބޮޑުކަން ހާމަކޮށްދޭ ކަމެކެވެ.