މިހާރު ގައުމު މިދަނީ އެމްޑީއެންގައި އެ ފާޅުކޮށްފައި ހުރި ނުރައްކާތެރި ވިހަ ޝިއާރުތަކާއި ދިމާއަށް ކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ޓައުން ހޯލު ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ ދުނިޔޭގެ ހިއުމަން ރައިޓްސް ކޮމިޝަނުން ކުރާ ސާވޭތަކުގައި ފެނިގެން ދަނީ ލާދިނީ ޖަމްއިއްޔާ އެމްޑީއެންއިން ނެރުނު ރިޕޯޓުގައި ހުންނަ ކަންތައްތަކަށް ބާރު ލިބޭ ގޮތަށް ހުންނަ މަންޒަރު ކަމަށެވެ.

އެގޮތުން އެމަނިކުފާނު ވަނީ، މި ދޭތެރެއިން ކުރި ސާވޭ އެއްގައި ދުނިޔޭގެ ގައުމުތަކުގެ ތެރެއިން ނަސާރާ ދީނަށް އެންމެ ބޮޑު މެޖޯރިޓި އޮންނަ، އިނގިރޭސިވިލާތް ފަދަ ގައުމުތަކުގައި، އިސްލާމްދީނަށް އަޅުކަން ކުރަން ހުއްދަދީ މިސްކިތްތައް އަޅަން ހުއްދަދޭ އުސޫލުން ރާއްޖޭގައި ވެސް ނަސާރާދީން ނުވަތަ އެހެން ދީންތަކަށް ވެސް ފުރުސަތުދީ ފައްޅިއާ ފާދިރީގެތައް އަޅަން ހުއްދަ ނުދޭންވީ ސަބަބެއް ނެތް ކަމަށް ބަޔާންކޮށްފައިވާ ކަމަށެވެ.

އެއީ ޖެހި ނުރައްކަލުގެ ރަނގަބީލެއްކަން ފާހަގަކުރައްވާ ރައީސް ޔާމީން ވިދާޅުވީ، ސައްތައިން ސައްތަ މުސްލިމު ގައުމެއްގައި ދީނީ މިނިވަންކަން ދީފި ނަމަ މުޅި މުޖުތަމައު ހަލާކުވެގެން ދާނެ ކަމަށާ އެފަދަ ކަންކަން ވެސް ރީސެޓުކުރަން ޖެހޭ ކަމަށެވެ.

ރައީސް ޔާމީން އިތުރަށް ވިދާޅުވީ، ދިވެހި ދިދައިގެ ދަށުގައި ތިބެ ހިއުމަން ރައިޓްސް ކޮމިޝަނަށްވެސް އެފަދަ ކަންކަމަށް ގޮވާނުލެވޭނެ ކަމަށާ ވަގުތުން އެކަންކަން ހުއްޓާލަން ޖެހޭ ކަމަށެވެ.