ރާއްޖޭގައި ބާއްވާ އިންތިހާބުތަކުގައި ބާތިލް ވޯޓު ގުނާނެ ގޮތް ތަފުސީލުކޮށް، އިންތިހާބުތަކާބެހޭ އާންމު ގަވާއިދަށް އިލެކްޝަންސް ކޮމިޝަން (އީސީ) އިން އިސްލާހުތަކެއް ގެނެސްފި އެވެ.
މީގެ ކުރިން އެ ގަވާއިދުގެ 39 ވަނަ މާއްދާގެ ހ. ގެ ގޮތުގައި އޮންނަނީ ސައްހަ ވޯޓު ކަނޑައަޅާނެ ގޮތުގެ ތަފުސީލުތައް ހިމެނޭ މާއްދާއެކެވެ.
ނަމަވެސް އެ މާއްދާގެ ނަން ބާތިލް ވޯޓަށް ބަދަލުކޮށް، މިހާރު އީސީ އިން ގެނެސްފައިވާ އިސްލާހުގައި ވޯޓެއް ބާތިލްކުރަން ޖެހޭ ހާލަތްތައް ތަފުސީލުކޮށްފައިވެ އެވެ.
އީސީގެ ނައިބު ރައީސް އިސްމާއިލް ހަބީބު ވިދާޅުވީ، ބާތިލް ވޯޓު ގިނަވުމަކީ ކޮމިޝަނުގެ ވަރަށް ބޮޑު ކަންބޮޑުވުމެއް ކަމަށާއި އެފަދަ ވޯޓުތައް މަދުކުރަން ދިރާސާ ވެސް ކޮށްފައިވާ ކަމަށެވެ.
އެގޮތުން ގަވާއިދަށް ގެނައި އިސްލާހުތަކަކީ ދިރާސާއަށް ބަލައި ގެނެސްފައިވާ އިސްލާހުތަކެއް ކަމަށް ހަބީބު ވިދާޅުވި އެވެ.
އަދި މަޖިލިސް އިންތިހާބަށް ދެމުންދާ ޓްރެއިނިން ތަކުގައި ވެސް، ހާއްސަކޮށް ރިޔާސީ އިންތިހާބުގައި ދިމާވި ކަންކަމަށް ރިއާޔަތް ކޮށް ބާތިލް ވޯޓު ކަނޑައަޅާނެ މިންގަނޑެއް ކިޔައިދީފައިވާނެ ކަމަށާއި އެކަންކަން ކޮމިޝަނުން ފާސްކޮށް ގާނޫނުގައި ހިމެނީ ކަމަށް ހަބީބު ވިދާޅުވި އެވެ.
ނިމިދިޔަ ގިނަ އިންތިހާބުތަކުގައި ބާތިލް ވޯޓުގެ އަދަދު ވަނީ އިތުރުވެފަ އެވެ. އެގޮތުން ރިޔާސީ އިންތިހާބުގެ ފަހުބުރުގައި 7،888 ވޯޓު ބާތިލުކަމަށް ގުނިއިރު، 17،442 މީހުން ނިކުމެ ވޯޓުދިން މާލެ ސިޓީ ކައުންސިލުގެ ބައި އިލެކްޝަނުގައި ވެސް 402 ވޯޓު ބާތިލުވި އެވެ.
