ނޭޝަނަލް ޑްރަގް އޭޖެންސީ (އެންޑީއޭ) ގެ ދަށުން ހުޅުމާލޭގައި ހިންގަމުން އަންނަ ހާފްވޭ ހައުސްގެ ސެކިއުރިޓީ މުވައްޒަފުން، އެ މުވައްޒަފުންގެ މުސާރައަށް އައި ބަދަލާ ގުޅިގެން ހިތްހަމަނުޖެހުން ފާޅުކޮށް މިއަދު މަސައްކަތް ހުއްޓާލައިފިއެވެ.
މިއަދު ހެނދުނުން ފެށިގެން އެ މުވައްޒަފުން އިހުތިޖާޖު ކުރަމުންދަނީ، ސަރުކާރުން އަލަށް އެކުލަވާލި ޕޭ ހާމަނައިޒޭޝަންގެ ދަށުން ސެކިއުރިޓީ މުވައްޒަފުންގެ މުސާރަ ވަރަށް ބޮޑުތަނުން ކުޑަވެފައިވާތީ އެކަމާ ހިތްހަމަނުޖެހުން ފާޅުކުރުމުގެ ގޮތުންނެވެ.
މަސައްކަތް ހުއްޓާލައި އިހުތިޖާޖު ކުރަމުންދާ މުވައްޒަފުން ބުނާ ގޮތުގައި، އައު އޮނިގަނޑަށް އަމަލުކުރަން ފެށުމާއެކު އެމީހުންނަށް ކުރިން ލިބެމުންދިޔަ އާމްދަނީއަށް ވަނީ ނޭދެވޭ އަސަރުތަކެއް ކޮށްފައެވެ.
އިހުތިޖާޖު ކުރަމުންދާ މުވައްޒަފުން ވަނީ އެންޑީއޭގެ މެނޭޖްމަންޓަށް ދެ ހުށަހެޅުމެއް ހުށަހަޅާފައެވެ. އެ މުވައްޒަފުންގެ މައިގަނޑު ދެ ޑިމާންޑަކީ:
1. މިހާރު ކަނޑައަޅާފައިވާ ޖޮބް މެޓްރިކްސް މުވައްޒަފުންނަށް ފައިދާވާނެ ގޮތަކަށް ބަދަލުކުރުން.
2. ސިވިލް ސާވިސްގެ އެހެން މުވައްޒަފުންނާ އެއްގޮތަށް މަސައްކަތު ގަޑިއަކީ 6 ގަޑިއިރު ކަމަށް ކަނޑައެޅުން ނުވަތަ 8 ގަޑިއިރު މަސައްކަތް ކުރަންޖެހޭނަމަ އިތުރުވާ 2 ގަޑިއިރަށް އޯޓީ (އިތުރުގަޑީގެ ފައިސާ) ލިބޭނެ އިންތިޒާމު ހަމަޖައްސައިދިނުން.
މިކަމާ ގުޅިގެން ހާފްވޭ ހައުސްގެ ސެކިއުރިޓީ ބެލެހެއްޓުމުގެ މަސައްކަތަށް މިއަދު ވަނީ ބުރޫއަރާފައެވެ. ނަމަވެސް، މި މައްސަލައާ ގުޅޭގޮތުން ނޭޝަނަލް ޑްރަގް އޭޖެންސީގެ ބަހެއް އަދި ރަސްމީކޮށް ލިބޭގޮތް ވަނީ ނުވެފައެވެ.
މުސާރައިގެ އައު އޮނިގަނޑާއެކު ބައެއް ދާއިރާތަކުގެ މުވައްޒަފުންގެ މުސާރައަށް އައި ބަދަލުތަކާ ގުޅިގެން މީގެ ކުރިންވެސް ބައެއް މުއައްސަސާތަކުގެ މުވައްޒަފުން ވަނީ ކަންބޮޑުވުން ފާޅުކޮށްފައެވެ.
