ރައީސް ޑރ މުހައްމަދު މުއިއްޒުގެ ސަރުކާރަކީ ދިވެހިންނަށް ބޮޑެތި ގެއްލުންތައް ދެމުންދާ ވިޔާނުދާ ސަރުކާރެއް ކަމަށް ޕީއެންއެފްގެ ރައީސް އަބްދުﷲ ޔާމީން ވިދާޅުވެއްޖެއެވެ.
އާދިއްތަ ދުވަހުގެރޭ ބޭއްވި ޕީއެންއެފްގެ ޓައުން ހޯލު ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރާއްޖޭގެ ޕޯޓަކީ ސަރަހައްދުގައިވެސް އޮތް އެންމެ ބޮޑު ތިޔާގި ޕޯޓު ކަމަށާ އެހެންކަމުން އެ ޕޯޓު ވިއްކާލުމަކީ ގައުމަށް ވެވޭ ބޮޑު ގައްދާރުކަމެއް ކަމަށެވެ.
މީގެ އިތުރުން އެއީ ޖީއެމްއާރަށް އެއާޕޯޓު ވިއްކާލުމަށް ވުރެވެސް ވިޔާނުދާ ކަމެއްގެ ގޮތުގައި ސިފަކުރައްވާ ރައީސް ޔާމީން ވިދާޅުވީ، ޑީޕީ ވޯލްޑަށް ޕޯޓު ދިނުމުން ޑައިރެކްޓުކޮށް ރާއްޖެއަށް ބޯޓުތަކަށް އެތެރެ ނުވެވޭނެ ކަމަށާ ނަތީޖާއަކަށް ވެގެން ދާނީ މުދަލުގެ އަގު ބޮޑުވެ ރައްޔިތުންނަށް ތަކްލީފުތަކާ ކުރިމަތިވުން ކަމަށް ވެސް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ ކޮޗިންގައި މިހާރުވެސް ރާއްޖޭގެ ޕޯޓަށް ވުރެ ބޮޑު ޕޯޓެއް ދުބާއީ ވޯލްޑިއިން އަޅާފައި އެބައޮތް ކަމަށާ އެހެންކަމުން ރާއްޖޭގައި އެ ފުރުސަތު ދުބާއީ ވޯލްޑަށް ދީފިނަމަ ރާއްޖެ ވެގެން ދާނީ ކޮޗިންގައި އޮތް ޕޯޓުގެ ސެޓެލައިޓަކަށް ކަމަށްވުމުން އެމަނިކުފާނުގެ ޒައާމަތުގައި އެ ފުރުސަތު އޭރު ނުދެއްވީ ކަމަށެވެ.
ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ ދުބާއީ ވޯލްޑަށް މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.
ޑީޕީ ވޯލްޑަށް ޕޯޓު ދިނުމުން މުދާ ކްލިއަރ ކުރަން ތިބި ދިވެހީންގެ ވަޒީފާ ގެއްލި އިންޑިއާ މީހުން ޑޮމިނޭޓުކުރާނެ. ޕޯޓު ވިއްކާލުމާ ދެކޮޅަށް ރައްޔިތުން ތެދުވަން ޖެހޭ. ޕޯޓު ވިއްކާލުމާ ދެކޮޅަށް ބަސްނުބުނެ މިއަދު ތިބޭ ކޮންމެ މެމްބަރަކީ ފަހުން އެމީހެއްގެ މައްޗަށް ދައުވާ އުފުލިގެންދާނެ މީހެއް.
ރައީސް ޔާމީން
ރައީސް ޔާމީން ވަނީ ޖީއެމްއާރު އަތުން އެއާޕޯޓު އަތުލި ފަދައިން އެމަނިކުފާނުގެ ވެރިކަމެއްގައި ޑީޕީ ވޯލްޑް އަތުން ޕޯޓު ވެސް ނަގާނެ ކަމަށާ އެކަމުގައި ޑީޕީ ވޯލްޑަށް އިންޒާރުދެއްވާފައެވެ.
