ސަރުކާރުން ދިވެހިރާއްޖޭގެ ގާނޫނު އަސާސީއަށް މިހާރު ގެންނަން އުޅޭ ބަދަލުތަކާ ދެކޮޅަށް އެންމެން އެކުގައި ތެދުވަން ޖެހޭ ކަމަށް ރާއްޖޭގެ ކުރީގެ ނައިބު ރައީސް، އަދި ޕީއެންއެފްގެ ވެސް ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ގައުމުގެ މައި ދެ އިންތިހާބު އެއްކޮށްލާ ހިންގަން އުޅެނީ ޖަރީމާއެއް ކަމަށް ހަނިމާދޫ ދާއިރާގެ މެމްބަރު އަބްދުލްޣަފޫރު މަޖިލިސް ތަޅުމުގައި ވިދާޅުވެފައިވާ ވުމާ ގުޅިގެން ޑރ ޖަމީލު ވަނީ އެކްސްގައި ޕޯސްޓެއް ކުރައްވާފައެވެ.

އެ ޕޯސްޓުގައި އެމަނިކުފާނު ވިދާޅުވެފައިވަނީ ރައީސް މުހައްމަދު މުއިއްޒު ރައްޔިތުންނަށް ބޮޑު މެނިފެސްޓޯއެއް ރިޔާސީ އަދި މަޖްލިސް އިންތިޚާބުގައި ހުށަހެޅި ކަމަށެވެ. އެމަނިކުފާނު ނެރުނު ވައުދު ނާމާގެ އެބުނާ ކިތާބުގައި ހުރި ވައުދުތައްވެސް ހިމެނޭ ގޮތަށް ބޮޑު މެނިފެސްޓޯއެއް އޮތްއިރު އެއިން ތަނަކު ގާނޫނު އަސާސީއަށް ގެންނަ ނިޒާމީ ބޮޑެތި ބަދަލުތަކުގެ ވާހަކައެއް ނެތް ކަމަށް ވެސް ވިދާޅުވިއެވެ.

އެހެންކަމުން އެގޮތަށް އިންތިޚާބުތަކާ ކުޅުމުގެ ބާރު ރައްޔިތުން ރައީސުލްޖުމްހޫރިއްޔާއަށް ދީފައެއް ނުވާކަން ފާހަގަކުރައްވާ ޑރ ޖަމީލު ވިދާޅުވެފައިވަނީ އެކަން ކުރަން ބޭނުންނަމަ އެމެންޑޭޓް ހޯދަން އިންތިޚާބަކަށް ދާން ޑިމޮކްރަސީތަކުގައި ލާޒިމްކުރާ ކަމަށެވެ.

ނޫނީ އެފަދަ ބަދަލުތައްވާނީ ޣައިރު ދުސްތޫރީ ކަމަކަށްކަން ފާހަގަކުރައްވާ ޑރ ޖަމީލު އިތުރަށް ވިދާޅުވެފައިވަނީ، ރައްޔިތުންގެ ތާއީދު ނުލިބޭނެކަން އެނގޭތީ އިންތިޚާބުތައް ޖަހައިގަތުމަށް ހިންގާ ޖަރީމާތަކުގެ ތެރެއިން ބޮޑު ކްރައިމަކަށް މެނުވީ އެކަން ނުވާނެ ކަމަށާ އެންމެން އެކުގައި އެކަމާ ދެކޮޅަށް ތެދުވުން ލާޒިމް ކަމަށެވެ.

ޑރ ޖަމީލު މިފަދައިން ވިދާޅުވެފައިވާއިރު، ސަރުކާރުން އެކަން ކުރަން އުޅެނީ ޚަރަދު ކުޑަކުރުމުގެ ނަމުގައެވެ. މިކަމާ ގުލިގެން ގިނަ ބަޔަކު ބުނަމުން ގެންދަނީ ޛަރަދު ކުޑަކުރަން ބޭނުން ނަމަ މިނިސްޓްރީތަކުގެ އަދަދު މަދުކޮށް ސިޔާސީ މުވައްޒަފުންގެ އަދަދު މަދުކުރުން މާރަގަޅު ކަމަށެވެ.