ޕޯޓު ވިއްކާލުމާ ދެކޮޅަށް ރައްޔިތުން ތެދުވަން ޖެހޭކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެެވެ.

އެމަނިކުފާނު މިފަދައިން ވިދާޅުވީ، އާދިއްތަ ދުވަހުގެރޭ ޕީއެންއެފުން ބޭއްވި އެ ޕާޓީގެ ޓައުން ހޯލު ޖަލްސާގައި ވާހަކަފުޅު ދައްކަވަމުންނެވެ. ރައީސް ޔާމީން ވިދާޅުވީ، ގާނޫނު އަސާސީއަށް ހިތުހުރި ގޮތަކަށް ބަދަލު ގެނައުމަކީ ރައީސުލްޖުމްހޫރިއްޔާއަކަށް ލިބިގެންވާ ލައިސަންސެއް ނޫން ކަމަށެވެ.

ހަމައެހެންމެ ހިތުހުރި ގޮތަކަށް ގާނޫނު އަސާސީއަށް ރައީސް މުހައްމަދު މުއިއްޒު ބަދަލު ގެންނަމުން ދާއިރު އެކަމާ ދެކޮޅަށް ބަސް ބުނަން ތިބޭ ބަޔަކީ ރައްޔިތުންގެ މަޖިލީހުގެ މެމްބަރުން ކަމަށްވާއިރު މިއަދު އެ މަޖިލިސް ވެސް އޮތީ އޮޅު ހިޔާ ފެސިލިޓީއަކަށް ބަދަލުވެފައިކަމުން އެކަންކަމުގައި ބަސްބުނުމަށް މަޖިލިސް ނުކުޅެދިފައިވާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން އެމަނިކުފާނު ވަނީ ޕޯޓު ވިއްކާލުމާ ދެކޮޅަށް ބަސް ނުބުނެ މިއަދު ތިބޭ ކޮންމެ މެމްބަރަކީ ފަހުން އެމީހެއްގެ މައްޗަށް ދައުވާ އުފުލިގެންދާނެ މީހެއްކަމަށްވެސް ވިދާޅުވެފައެވެ.

ރައީސް ޔާމީންވަނީ، ޖީއެމްއާރު އަތުން ރާއްޖޭގެ މައި އެއާޕޯޓު އަތުލި ގޮތަށް އެމަނިކުފާނުގެ ވެރިކަމެއްގައި ޑިޕީ ވޯލްޑް އަތުން ރާއްޖޭގެ މައި ޕޯޓުވެސް އަތުލާނެ ކަމުގެ އިންޒާރު ދެއްވާފައެވެ.