ރައީސް ޑރ މުހައްމަދު މުއިއްޒުގެ ސަރުކާރަކީ ގައުމީ ރޫހުގެ ކަންފުޅެއްވެސް ނެތް ސަރުާރެއްގެ ގޮތުގައި ޕީޕަލްސް ނެޝަނަލް ފްރޮންޓު (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ސިފަކުރައްވައިފިއެވެ.

މަލީހު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

މަލީހު ވިދާޅުވެފައިވަނީ ލޯނު ދެއްކުމުގެ ނަމުގައި ޤައުމުގެ ހަރުމުދާތައް ވިއްކުމުގެ ބޮޑު ޖަރީމާއެއް މި ސަރުކާރުން ތަންފީޒުކުރަމުންދާކަމަށާ އެއީ ދެކޮޅު ނެހެދޭނެ ކަމެއް ކަމަށެވެ.

ކަން މިހެން އޮތްއިރު ރައްޔިތުން ނުކުމެ އެކަންކަން ނުހުއްޓުވައިފިނަމަ އިޔާދަ ނުކުރެވޭވަރު ގެއްލުމާއި ކުރިމާތިލާން ޖެހޭނެ ކަމަށް ވެސް މަލީހު ވަނީ ވިދާޅުވެފައެވެ.

މަލީހުގެ ޕޯސްޓު ނިންމަވާލައްވަމުން ވަނީ މިސަރުކާރަކީ ޤައުމީ ރޫހުގެ ކަންފުޅެއް އޮތް ސަރުކާރެއް ނޫން ކަމަށްވެސް ވިދާޅުވެފައެވެ.

މަލީހު މިފަދައިން ޕޯސްޓު ކުރައްވާފައިވާ މިވަނީ ގައުމުގެ މައި ސީ ޕޯޓު ދުބާއީ ވޯލްޑަށް ވިއްކާލާ އަދި ގައުމުގެ އުތުރުގެ އެންމެ މައި ހަބު، ހަނިމާދޫ އިންޓަރނޭޝަނަލް އެއާޕޯޓާ ހަވާލުވާން އިންޑިއާއަށް ޚުދު ރައީސް މުއިއްޒު ދައުވަތުދެއްވާފައިވެސް ވަނިކޮށްކަން ފާހަގަކޮށްލެވެއެވެ.