އެމެރިކާގެ ހޮލޮކޯސްޓް މެމޯރިއަލް މިއުޒިއަމުން ނެރުނު 2025-2026 ވަނަ އަހަރުގެ "އާލީ ވޯނިންގް" ރިޕޯޓުގައިވާ ގޮތުން، ދުނިޔޭގެ ފެންވަރުގައި ގިނަ އަދަދެއްގެ އާންމު ރައްޔިތުން (ސިވިލިއަންސް) މަރާލުމުގެ ނުރައްކާ އެންމެ ބޮޑު ހަތަރު ގައުމުގެ ތެރޭގައި އިންޑިއާ ހިމެނިއްޖެއެވެ.

މި ރިޕޯޓަކީ ދުނިޔޭގެ ގައުމުތަކުގައި ނަސްލު ނައްތާލުމާއި، ގިނަ ބަޔަކު މަރާލުމުގެ ފުރުސަތު އޮތް މިންވަރު ބަލައި ތައްޔާރުކުރާ ރިޕޯޓެކެވެ. މިފަހަރުގެ ރިޕޯޓުން ދައްކާގޮތުގައި، އިންޑިއާގައި އޮތް ހަރުކަށި ފިކުރުގެ ސިޔާސަތުތަކާއި، ވަކި ދީންތަކަކަށް ނިސްބަތްވާ މީހުންނާ މެދު ބާއްވާ ތަފާތުކުރުންތަކުގެ ސަބަބުން އެ ގައުމަކީ އާންމުންގެ ފުރާނައަށް ބޮޑު ނުރައްކަލެއް އޮތް ތަނެއްގެ ގޮތުގައި ވަނީ ފާހަގަވެފައެވެ.

ޚާއްޞަކޮށް އިންޑިއާގެ މައިނޯރިޓީ ނުވަތަ މަދު އަދަދެއްގެ މީހުން އުޅޭ ދީނީ ޖަމާއަތްތަކަށް އަމާޒުކޮށް ހިންގާ އަނިޔާވެރި އަމަލުތަކާއި، ސަރުކާރުން އެކަންކަމަށް ހިތްވަރުދޭ ފަދަ ސިޔާސަތުތަކުގެ ސަބަބުން، ކުރިއަށް އޮތް ދެ އަހަރެއްހާ ދުވަހުގެ ތެރޭގައި އެ ގައުމުގައި ބޮޑު ލޭއޮހޮރުވުމެއް ހިނގައިދާނެ ކަމުގެ އިންޒާރު މިއުޒިއަމްގެ ރިޕޯޓުގައި ވަނީ ދީފައެވެ.

މި ރިޕޯޓުގައި އިންޑިއާ ހިމެނިފައިވަނީ މިޔަންމާރ، ޗާދް، ސޫދާން ފަދަ ދާޚިލީ ހަނގުރާމަތަކާއި ނުތަނަވަސްކަން ބޮޑު ގައުމުތަކާއެކު އެންމެ ނުރައްކާތެރި ގިންތީގައެވެ. މިއީ އިންޑިއާގެ މިހާރުގެ ސަރުކާރުގެ ސިޔާސަތުތަކުގެ ސަބަބުން އެ ގައުމުގެ އިންސާނީ ހައްގުތަކުގެ ހާލަތު ބޮޑު އަނދަވަޅަކަށް ވެއްޓިފައިވާ ކަމުގެ ހެއްކެއް ކަމަށް ބައިނަލްއަގުވާމީ ފަރާތްތަކުން ފާހަގަކުރެއެވެ.