ޕެންޝަންއަކީ ކޭޝް ފްލޯއަށް ބަލައިގެން ޖަމާކުރަން އޮންނަ އެއްޗެއް ނޫން ކަމަށް ޕީއެންއެފްގެ ސެނެޓަރ ނާއިފް ޝައުކަތު ވިދާޅުވެއްޖެއެވެ،
ސަރުކާރުގެ ކުންފުނި ވެމްކޯއާ ބީސީސީގެ މުވައްޒަފުންގެ ޕެންޝަން ޖަމާނުކުރާތާ 14 މަސް ފާއިތުވެފައިވާއިރު އެ ކުންފުނިން ދެއްކި ބަހަނާއަކީ ކުންފުނީގެ ޚޭޝް ފްލޯ ތާށިވުމެވެ.
މިކަމަށް އިޝާރާތްކުރައްވާ ނާއިފު އެކްސްގައި ކުރެއްވި ޕޯސްޓެއްގައި ވިދާޅުވީ، ނިކަމެތި މުވައްޒަފުން އަތުން ކޮންމެ މަހަކު ޕެންޝަނަށް ކަނޑާ އުސޫލުން އެ ފައިސާ ޖަމާވެސް ކުރެވެން ޖެހޭނެ ކަމަށާ އެއީ ކޭޝް ފްލޯއަށް ބަލައިގެން ޖަމާކުރަން އޮންނަ އެއްޗެއް ނޫން ކަމަށެވެ.
މީގެ އިތުރުން ނާއިފް ވަނީ ސަރުކާރުން ބޭނުންވާ ގޮތަށް ހުރިހާކަމެއް އަބަދު ކުރެވޭނެ ކަމަށް ހީނުކުރުމަށް ގޮވާލާ ގާނޫނު އަރާ ވެރިންނާ ހަމަ ކުރާ ުވަސް އޮތީ ދުރުގައި ނޫން ކަމަށްވެސް ވިދާޅުވެފައެވެ.
ވެމްކޯއިން ބުނެފައިވާ ގޮތުގައި ޕެންޝަން ފައިސާ ޖަމާނުވަނީ އެ ކުންފުންޏަށް ލިބެންޖެހޭ ފައިސާތައް ނުލިބޭތީ ކަމަށެވެ. ފައިސާ ނުލިބޭ ގިނަ ތަންތަން އެބަހުރި ކަމަށް އެ ކުންފުނިން ބުނިނަމަވެސް ހަމައެކަނި ހާމަކުރީ އެންމެ ތަނެއްގެ މައުލޫމާތެވެ.
ފައިސާ ނުލިބޭކަމުގެ ބަހަނާ ދައްކަމުންދާއިރު، ވެމްކޯއިން ވަނީ ފާއިތުވި ދުވަސްތަކުގައި ބޭނުންވާ އަދަދަށްވުރެ ގިނައިން މުވައްޒަފުން ނަގާފައެވެ.
ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް ވެސް އަންނަނީ އިތުރު ބަޔަކަށް ވަޒީފާތައް ދެމުންނެވެ.
