މިނިސްޓްރީ އޮފް އެޑިއުކޭޝަންގެ ދަށުން މަސައްކަތްކުރާ މުވައްޒަފުންގެ ޕެންޝަން ފަންޑަށް އެ މިނިސްޓްރީން ޖަމާކުރަންޖެހޭ ފައިސާ ޖަމާނުކުރާކަން ހާމަވެއްޖެއެވެ.

މިކަން ހާމަވެފައިވަނީ އެ މިނިސްޓްރީގައި މަސައްކަތްކުރަމުންދާ ބައެއް މުވައްޒަފުންގެ ޕެންޝަން ފައިސާގެ ތަފްސީލުންނެވެ. އެގޮތުން ބައެއް މުވައްޒަފުންގެ ޕެންޝަން އެކައުންޓުތަކުގެ ތަފްސީލުން އެނގޭ ގޮތުގައި އެ ފައިސާ ޖަމާ ނުކުރާތާ 6 މަހަަށްވުރެ ގިނަ ދުވަސް ވަނީ ވެފައެވެ.

ކޮންމެ މުވައްޒަފެއްގެ އަސާސީ މުސާރައިގެ ހަތް ޕަސެންޓް ޕެންޝަން ފަންޑަށް އުނިކޮށް، ވަޒީފާދޭ ފަރާތުން ވެސް އެ މުވައްޒަފެއްގެ އަސާސީ މުސާރައިގެ ހަތް ޕަސެންޓާ އެއްވަރުގެ އަދަދެއް ޕެންޝަން ފަންޑަށް ޖަމާކުރުމަކީ ރާއްޖޭގެ ޕެންޝަނާބެހޭ ގާނޫނުގައި ބުނާ ގޮތެވެ.

ކަން ހިނގާފައި އޮތް ގޮތަށް ބަލާއިރު، އެޑިއުކޭޝަން މިނިސްޓްރީއިން މުވައްޒަފުންގެ މުސާރައިން އުނިކުރާ ބައި ޕެންޝަން ފަންޑަށް ދައްކަމުންދިޔަ ނަމަވެސް، ވަޒީފާދޭ ފަރާތުގެ ހައިސިއްޔަތުން މިނިސްޓްރީއިން ދައްކަންޖެހޭ ބައި ޖަމާކޮށްފައެއް ނުވަނީއެވެ.

މިކަމުގައި މިނިިސްޓްރީގެ ބަހެއް ނެތްއިރު، މިފަދަ މައްސަލައެއް ދާދިފަހުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިންވެސް ފެންމަތިވެފައިވެއެވެ.

ސަރުކާރުގެ ބައެއް އެހެން އިދާރާތަކުންވެސް ޕެންޝަން ފައިސާ ގަވާއިދުން ނުދައްކާ ކަމުގެ ޝަކުވާތައް އިތުރުވަމުންދާއިރު، ވަޒީފާ އަދާކުރާ ކޮންމެ ދިވެއްސަކާއި ވަޒީފާދޭ ފަރާތުން ޕެންޝަނަށް ފައިސާ ދެއްކުމަކީ ގާނޫނީގޮތުން ލާޒިމްކަމެކެވެ.