ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ މުވައްޒަފުންގެ މަސައްކަތު މާހައުލުގެ ރައްކާތެރިކަން ދެނެގަތުމަށް، އަވަސް ތަހުގީގެއް ހިންގަން ނިންމައިފިއެވެ.
މިފަދަ ތަހުގީގެއް ހިންގަން ނިންމާފައިވަނީ، ހިއުމަން ރައިޓްސް އޮފް މޯލްޑިވްސް (އެޗްއާރުސީއެމް) އިންނެވެ.
އެޗްއާރްސީއެމް އިން އެ ކޮމިޝަންގެ އެކްސްގައި ހިއްސާކުރި ޕޯސްޓެއްގައި ބުނެފައިވަނީ، އަންގާރަ ދުވަހުގެރޭ ބޭއްވި އެ ކޮމިޝަނުގެ ބައްދަލުވުމެއްގައި އެގޮތަށް ނިންމީ، ފާއިތުވި ދެ މަސްދުވަހުގެ ތެރޭގައި މުވައްޒަފުންގެ ސަލާމަތާ މެދު ސުވާލު އުފެދޭ ތިން ހާދިސާއެއް ވެމްކޯގައި އެ މުވައްޒަފުން ވަޒީފާ އަދާކުރަމުން ދިޔަ މާހައުލުގައި ހިނގާފައިވާތީ އެވެ.
މި ތަހުގީގަކީ މަސައްކަތުގެ މާހައުލުގައި ހުރި ނުރައްކާތައް ދެނެގަނެ، މުވައްޒަފުންގެ ހައްގުތަކާއި ސަލާމަތްތެރިކަން ކަށަވަރުކުރަން ކުރަންވީ ކަންތައްތައް ދެނެގަތުމަށް ހިނގާ ތަހުގީގެއް ކަމަށްވެސް އެޗްއާރުސީއެމުން ވަނީ ހާމަކޮށްފައެވެ.
މިދިޔަ ޖެނުއަރީ 26 ވަނަ ދުވަހު ތިލަފުށީގައި ކުނި ނަގަން އުޅުމުގެ ތެރޭގައި ހައިމާކެއްގެ ދަތްގަނޑުން ޖެހި، ބަންގްލަދޭޝްގެ މުވައްޒަފެއް ކަމަށްވާ އަމީން މިއާ ވަނީ މަރުވެފަ އެވެ. އެ ހާދިސާ ފުލުހުންނަށް ރިޕޯޓްކުރީ ވެސް ދެ ދުވަސް ފަހުންނެވެ.
މީގެއިތުރުން މަސައްކަތުގެ މާހައުލުގައި ހިނގި ހާދިސާއަކާ ގުޅިގެން ވެމްކޯގެ ދިވެހި މުވައްޒަފަކަށް ވެންޓިލޭޓަރުގައި އަންނަނީ ފަރުވާދެމުންނެވެ.
