ހުޅުމާލޭގެ މަގުތަކުގެ ދެފަރާތުގައި ގިނަ އަހަރުތަކެއް ވަންދެން ހައްދާފައިވާ ބޮޑެތި ރީތި ގަސްތައް ކަނޑައި ނައްތާލަމުންދާ ދިއުމަކީ ރައީސް މުޢިއްޒުގެ ސަރުކާރުން ހިންގަމުންދާ ތިމާވެށީގެ "ގަތުލުއާންމެއް" ކަމަށް ބުނެ ގިނަ ބައެއްގެ ފާޑުކިޔުން އަމާޒުވެއްޖެއެވެ.

ހުޅުމާލޭގެ އެކި ސަރަހައްދުތަކުން ބިޔަ ގަސްތައް އުފުރައި، މަގުތަކުގެ ފެހިކަންބައި ހުސްކުރަމުންދާ މި އަމަލަކީ ތިމާވެށި ހިމާޔަތްކުރުމަށް އޮތް ގާނޫނީ ޒިންމާއަށް އިހުމާލުވުން ކަމަށް ތިމާވެށީގެ ހިމާޔަތުގައި މަސައްކަތްކުރާ ފަރާތްތަކުން އަންނަނީ ބުނަމުންނެވެ. ގާނޫނުއަސާސީން ދައުލަތުގެ މައްޗަށް ލާޒިމުކުރާ މި މުހިންމު ޒިންމާއާ ހިލާފަށް، ވެށި ހަލާކުކުރުމަކީ ހަމައެކަނި ގުދުރަތީ ނިޒާމަށް ދެވޭ ގެއްލުމެއް ނޫން ކަމަށާއި، އެއީ ގައުމުގެ ގާނޫނުތަކަށްވެސް ދެވޭ ހަމަލާއެއްގެ ގޮތުގައި ގިނަ ބަޔަކު ސިފަކުރެއެވެ.

އަންނާން އޮތް ޖީލުތަކަށް ދުޅަހެޔޮ އަދި ރައްކާތެރި ތިމާވެއްޓެއް ވާރުތަކޮށްދިނުމަކީ ދައުލަތުގެ އެންމެ ބޮޑު އެއް މަސްއޫލިއްޔަތު ކަމަށްވާއިރު، ތަރައްގީގެ ނަމުގައި ހުޅުމާލޭގެ ފެހިކަން ނައްތާލުމަކީ ރައީސް މުޢިއްޒުގެ ސަރުކާރު މި ދާއިރާއިން ބޮޑުތަނުން ފެއިލްވެފައިވާ ކަމުގެ ހެއްކެއް ކަމަށް ފާޑުކިޔާ ފަރާތްތަކުން ބުނެއެވެ.

މިކަމާ ގުޅިގެން އާންމުންގެ މެދުގައި ބޮޑު ނުތަނަވަސްކަމެއް އުފެދިފައިވާއިރު، ހުޅުމާލޭގެ މަގުތަކުން ފެންނަ ހިޔާވަހިކަމާއި ރީތިކަން ގެއްލިގެންދިއުމަކީ ތިމާވެށީގެ ގޮތުންނާއި އިޖުތިމާއީ ގޮތުންވެސް ލިބޭނެ ފޫނުބެއްދޭނެ އުނިކަމެއް ކަމަށް ފާހަގަކުރެވެއެވެ. ސަރުކާރުން މިފަދަ ނިންމުންތައް ނިންމާއިރު ތިމާވެއްޓަށް ކުރާނެ އަސަރުތަކަށް ރިއާޔަތްނުކުރާ ކަމުގެ ޝަކުވާ މިހާރު ވަނީ ވަރަށް ބޮޑަށް އިތުރުވެފައެވެ.