އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި، ރާއްޖޭގައި ހުންނަ އިންޑިއާގެ ހައި ކޮމިޝަނުން މިއަދު ހާއްސަ ރަސްމިއްޔާތެއް ބާއްވައިފިއެވެ.

މާލޭގައި ހުންނަ އިންޑިއާ ހައި ކޮމިޝަނުގައި ބޭއްވި މި ރަސްމިއްޔާތުގައި، އިންޑިއާގެ ގައުމީ ދިދަ ނަންގަވައިދެއްވީ އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް (ޖީ. ބަލަސުބްރަމާނިއަމް) އެވެ. ދިދަ ނެންގެވުމަށްފަހު، އިންޑިއާގެ ގައުމީ ސަލާމް ކިޔުން އޮތެވެ.

މި ހަފްލާގައި ސަފީރު ވަނީ އެ ގައުމުގެ ރައީސް ދުރޫޕަދީ މުރުމޫ ފޮނުއްވި ޖުމްހޫރީ ދުވަހުގެ ހިތާބު އިއްވައިދެއްވާފައެވެ. އަދި ހަފްލާގެ ބައިވެރިންނާ މުހާތަބު ކުރައްވައި ވާހަކަފުޅު ދައްކަވަމުން، އިންޑިއާ އާއި ރާއްޖެއާ ދެމެދު އޮތް ގުޅުމުގެ މައްޗަށް އަލިއަޅުއްވާލެއްވިއެވެ.

ނަމަވެސް، ރާއްޖެ އާއި އިންޑިއާގެ ގުޅުމުގެ ވާހަކަ ދެކެވޭއިރު، ރާއްޖެ އިންޑިއާއަށް ބޮޑުތަނުން ދަރަނިވެރިވެފައިވާ މައްސަލައަކީ ގިނަ ބައެއްގެ ކަންބޮޑުވުން އޮތް ކަމެކެވެ. ރައީސް ޑރ. މުޙައްމަދު މުޢިއްޒުގެ ސަރުކާރުން އިންޑިއާއަށް ދައްކަންޖެހޭ ދަރަނިތައް އިތުރުވަމުންދާތީ، ބައެއް ފަރާތްތަކުން ތުހުމަތުކުރާ ގޮތުގައި މި ސަރުކާރު ވަނީ އިންޑިއާގެ ނުފޫޒުގެ ދަށުވެ، ގައުމުގެ މިނިވަންކަން ގެއްލޭ ފަދަ މިންވަރަކަށް އެ ގައުމަށް "ވިކިފައެވެ". މިގޮތުން ދަރަނި ދެއްކުމަށްޓަކައި އިންޑިއާއިން އިތުރު ލޯނުތައް ހޯދުމާއި، މާލީ އެހީތެރިކަމަށް ބަރޯސާވާންޖެހުމަކީ ރާއްޖޭގެ މިނިވަންކަމަށް އޮތް ނުރައްކަލެއްގެ ގޮތުގައި ސިޔާސީ ބައެއް ފަރާތްތަކުން ސިފަކުރެއެވެ.

މި ރަސްމިއްޔާތުގައި ރާއްޖޭގައި ދިރިއުޅޭ އިންޑިއާގެ ގިނަ އަދަދެއްގެ ރައްޔިތުންނާއި، ހައި ކޮމިޝަނުގެ އިސްވެރިން ބައިވެރިވެވަޑައިގެންނެވިއެވެ. އިންޑިއާގެ ޖުމްހޫރީ ދުވަސް ފާހަގަކުރަނީ 1950 ވަނަ އަހަރު އެ ގައުމުގެ ގާނޫނުއަސާސީއަށް އަމަލުކުރަން ފެށި ތާރީހާ ގުޅުވައިގެންނެވެ.