މިދިޔަ އަހަރުގެ ގޯލްޑަން ފުޓްސަލް މުބާރާތުގެ ފައިނަލްގައި ކުރިމަތިވި ނާކާމިޔާބީގެ ހިތްދަތި ހަނދާންތައް ފޮހެލައި، ގއ. ދެއްވަދޫގެ ވަރުގަދަ "ސްޓާ" ކުޅުންތެރިންގެ މައްޗަށް ކުރިހޯދައި ހދ. ނައިވާދޫއިން މިއަހަރުގެ ގޯލްޑަން ފުޓްސަލް ޗެލެންޖުގެ ތަށި އުފުލާލައިފިއެވެ.
މިރޭ ހުޅުމާލޭ ރެހެންދީ ފުޓްސަލް ދަނޑުގައި ކުޅުނު ފޯރިގަދަ ފައިނަލް މެޗުގައި ނައިވާދޫއިން ވަނީ 9-3 ގެ ބޮޑު ތަފާތަކުން ދެއްވަދޫ ބަލިކޮށްފައެވެ. ގައުމީ ފެންވަރުގެ މޮޅު ކުޅުންތެރިންތަކަކާއެކު ނުކުތް ދެއްވަދޫ ޓީމުން މެޗު ފެށިގެން އެންމެ 15 ސިކުންތުގެ ތެރޭގައި ގޯލެއް ޖަހައި ލީޑު ނެގި ނަމަވެސް، ނައިވާދޫއިން ވަނީ އާދަޔާޚިލާފު ހިތްވަރެއް ދައްކައި މެޗުގެ ނަތީޖާ އެމީހުންގެ ކޮޅަށް އަނބުރާލާފައެވެ.
މިދިޔަ އަހަރުގެ މުބާރާތުން ބަލިވެ، މާޔޫސްކަމާއެކު އެނބުރި ރަށަށް ދާންޖެހުނު ނައިވާދޫ ޓީމުން މިއަހަރު ފެނިގެންދިޔައީ މުޅިން ތަފާތު ރޫޙެއްގައެވެ. ދެއްވަދޫގެ "ސްޓާ" ޕްލޭޔަރުން ހުއްޓުވުމުގައި ނައިވާދޫގެ ކުޅުންތެރިން ދެއްކި މޮޅު ޑިސިޕްލިންއާއި، އެޓީމުން އުފެއްދި ބާރުގަދަ ހަމަލާތަކުގެ ކުރިމަތީގައި ދެއްވަދޫއަށް ޖެހުނީ އިސްޖަހާލާށެވެ.
މެޗުގެ ގިނަ ވަގުތު ކޮންޓްރޯލްކޮށްގެން ކުޅުނު ނައިވާދޫއިން ވަނީ ފުލުފުލުގައި ލަނޑުތައް ޖަހައި، ދެއްވަދޫގެ އުއްމީދުތައް ފުނޑުފުނޑުކޮށްލާފައެވެ. މިއީ މިދިޔަ އަހަރުގެ ނާކާމިޔާބީން އިބުރަތް ހާސިލުކޮށް، މިންނެތް މަސައްކަތުން ނައިވާދޫއިން ހޯދި ފަޚުރުވެރި ކާމިޔާބީއެކެވެ.
މި މުބާރާތުގެ ތަށި ހދ. އަތޮޅުގެ ރަށަކުން ފުރަތަމަ ފަހަރަށް ހޯދުމާއެކު، ނައިވާދޫގެ ސަޕޯޓަރުން ވަނީ ދަނޑުގަޔާއި ރަށުގައި ވަރަށް ފޯރިއާއެކު އުފާފާޅުކޮށްފައެވެ. މިއީ އެ ރަށުގެ ކުޅިވަރު ތާރީޚުގައި ރަން އަކުރުން ފަވާލެވޭނެ ރެއެކެވެ.
