ޒުވާން ޚަތީބުން ތަމްރީނު ކުރުމުގެ ފުރަތަމަ ބުރުގައި ބައިވެރިވި ޚަތީބުންނަށް ސެޓުފިކެޓު ހަވާލުކޮށްފިއެވެ.

އިސްލާމީ ކަންތައްތަކާ ބެހޭ ވުޒާރާއިން އިސްނަގައިގެން ހިންގަމުން ގެންދާ މި ޕްރޮގްރާމުގެ މާލެ ސަރަހައްދުގައި ތިބި ފަރާތްތަކުގެ ތަމްރީން ޕްރޮގްރާމް ކުރިއަށް ގެންދިޔައީ މިމަހުގެ ހަ ވަނަ ދުވަހުން ފެށިގެން މި މަހުގެ ނުވަ ވަނަ ދުވަހުގެ ނިޔަލަށެވެ.

ސަލްމާނު މިސްކިތުގައި ކުރިއަށް ގެންދިޔަ މި ތަމްރީނުގައި، މޮސްކް މެނޭޖްމަންޓް، ހުތުބާ ކިޔުމުގެ ފަންނު، ޖަނާޒާގެ ކަންކަން، އިމާމުގެ އަހުލާގު، މިސްކިތުގެ ދައުރު، ނަމާދު ފިގުހުއާ ގުޅޭގޮތުން ވަނީ ތަމްރީނު ދީފައެވެ. މި ތަމްރީނުތަކަށްފަހު އިމްތިހާނެއް ނޯންނާނެ ކަމަށް އިސްލާމީ ކަންތައްތަކާއި ބެހޭ ވުޒާރާއިން ވަނީ ވިދާޅުވެފައެވެ.

މި ޕްރޮގްރާމަކީ އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދުގެ އިސްނެންގެވުމުގެ މަތިން، ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރުކުރުމުގެ ހުއްދަ ދިނުމަށްޓަކައި އިންތިޒާމުކޮށްފައިވާ ޕްރޮގްރާމެކެވެ.

މި ޕްރޮގްރާމުގެ ފުރަތަމަ ބުރުގައި 57 ޚަތީބުން ތަމްރީނުކޮށްފައިވެއެވެ.

މި ޕްރޮގުރާމުގައި ބައިވެރިވެފައިވާ ޒުވާނުން މި ރަމަޟާން މަހު ހުތުބާ ކިޔާނެ ކަމަށް މީގެ ކުރިން ވަޒީރު ޝަހީމް ވަނީ ވިދާޅުވެފައެވެ.