ދިވެހިރާއްޖޭގެ ކުރީގެ ނައިބު ރައީސް އަދި ޕީއެންއެފްގެވެސް ނައިބު ރައީސް ޑރ. މުޙައްމަދު ޖަމީލް އަޙްމަދު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތަށާއި ދީނީ ކަންކަމުގައި ގެންގުޅުއްވާ އުސޫލުތަކަށް ވަރަށް ބޮޑަށް ފާޑުވިދާޅުވެ، ބަހުގެ ހަމަލާތަކެއް އަމާޒުކުރައްވައިފިއެވެ.
ޑރ ޖަމީލް މިއަދު އެކްސްގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ، ރައީސް މުޢިއްޒަކީ އަބަދުވެސް 'ދީނީ ކާޑު' ކުޅުއްވައިގެން ރައްޔިތުންނަށް ދީނީ ނަސޭޙަތް ދެއްވާ ބޭފުޅެއް ކަމަށާއި، ނަމަވެސް މެލޭޝިޔާއަކީ ސައްތައިން ސައްތަ މުސްލިމް ގައުމަކަށް ނުވީ ނަމަވެސް، އިސްލާމީ އުންމަތުގެ ހައްގުގައި ވަކާލާތު ކުރުމުގައި އެ ގައުމު އޮތީ ރާއްޖެއަށް ވުރެ މާ ކުރީގައެވެ.
މެލޭޝިއާގެ ގާނޫނީ މަޖިލީހުންވަނީ ޒްރޭލުން އީރާނަށް ދެމުންދާ ހަމަލާތަކާ ގުޅިގެން ރައްޔިތުންގެ މަޖިލީހުން ގަރާރެއް ފާސްކޮށް، ހިތާމަފާޅުކުރުމުގެ ހިމޭން ވަގުތުކޮޅެއް ނަގާފައެވެ. މިގޮތުން ޑރ ޖަމީލް ވަނީ ދިވެހިރާއްޖެއިން މިވަރު ކޮށްލަން ނުކެރުނީ ކީއްވެގެންތޯ ސުވާލު އުފައްދަވާފައެވެ.
ޖަމީލް އިތުރަށް ވިދާޅުވީ، އީރާނުގެ ރޫހާނީ ލީޑަރު އާޔަތުﷲ ޚާމަނާއި އަވަހާރަވުމާ ގުޅިގެން ރައީސް މުއިއްޒު ތައުޒިޔާ ވިދާޅުނުވުމާއި، އިޒްރޭލާއި އެމެރިކާ ކުށްވެރިކޮށް ސީދާ ބަހުން ވާހަކަ ނުދައްކަވާތީ ހިތާމަކުރައްވާ ކަމަށެވެ. އަދި ސަރުކާރުން މިކަމާ ގުޅިގެން ބަޔާނެއް ނެރުނީވެސް ނޫސްވެރިންނާއި އާންމު ރައްޔިތުންގެ ބޮޑު ޕްރެޝަރެއް އައުމުން ކަމަށް ޖަމީލް ތުހުމަތު ކުރެއްވިއެވެ.
