ސަރުކާރުގެ ކުންފުނި އެސްޓީއޯއިން ވިއްކާ ޑީސަލާއި ޕެޓްރޯލްގެ އަގު ރެކޯޑް މިންވަރަކަށް މަތިކޮށްފިއެވެ.
މެދު އިރުމަތީ ހަނގުރާމައިގެ ސަބަބުން ތެލާ ކާބޯތަކެތި އަދި އަސާސީ ތަކެތި ނުލިބުމުގެ ބިރު ނެތް ކަމަށް ރައީސް ޑރ މުހައްމަދު މުއިއްޒު ވިދާޅުވިތާ 72 ގަޑިއިރު ނުވަނީސް ތެލުގެ އަގު ބޮޑުކުރިކަމަށް އެސްޓީއޯއިން ވަނީ އިއުލާންކޮށްފައެވެ.
އީރާން ހަނގުރާމައާ ވިދިގެން ދުނިޔޭގައި ތެލުގެ އަގުތައް ރެކޯޑް އަދަދަކަށް ބޮޑުވެފައި ވަނިކޮށް އެސްޓީއޯއިން ނެރުނު ބަޔާނެއްގައި ބުނީ ބުދަ ދުވަހުން ފެށިގެން އެ ކުންފުނިން ވިއްކާ ޕެޓްރޯލާއި ޑީސަލްގެ އަގު ބޮޑުކުރަން ނިންމާފައިވާ ކަމަށެވެ. ޕެޓްރޯލާއި ޑީސަލް ވިއްކާނެ އާ އަގުތަކުގެ ގޮތުގައި އިއުލާންކޮށްފައިވަނީ، ޕެޓްރޯލް ލީޓަރަކުން 2.51ރ. އަގުބޮޑުކޮށް 16.01ރ. އަށް، އަދި ޑީސަލް: ލީޓަރަކުން 3.62ރ. ބޮޑުކޮށް 17.54ރ. އަށެވެ.
އެހެންކަމުން މިއީ ޕެޓްރޯލު ލީޓަރަކުން %18.6ގެ ބޮޑުވުމެކެވެ. އަދި ޑީސަލް ލީޓަރަކުން މިއީ %26ގެ ބޮޑުވުމެއްކަން ވެސް ފާހަގަކޮށްލެވެއެވެ.
މީގެ ކުރިން އެ ކުންފުނިން ޕެޓްރޯލް ލީޓަރެއް ވިއްކީ، 13.50ރ. އަށެވެ. އަދި ޑީސަލް ވިއްކީ ލީޓަރެއް 13.92ރ. އަށެވެ. މިއީ ރާއްޖޭގެ ތާރީޚުގައިވެސް އެސްޓީއޯއިން ވިއްކާ ތެލުގެ އަގު މިހާ ބޮޑު މިންވަރަކަށް އިތުރުކުރި ފުރަތަމަ ފަހަރެވެ.
އެސްޓީއޯއިން ތެލުގެ އަގުތައް ބޮޑުކޮށްފައި މި ވަނީ ދުނިޔޭގެ ބާޒާރުގައި ތެލުގެ އަގު މިވަގުތު އުފުލިފައި ވާތީކަމަށް ބުނި ނަމަވެސް ރާއްޖެއަށް ތެލުގެ ދަތިކަން ކުރިމަތި ނުވާނެ ކަމަށާ އެކަމުގައި ކަންބޮޑުވުުމެއް ނެތް ކަމަށް ރައީސް ޑރ މުއިއްޒު ވަނީ ވިދާޅުވެފައެވެ.
