އިސްލާމީ އުންމަތާ ދެކޮޅަށް އިސްރާއީލާއި އެމެރިކާއިން ހިންގަމުންދާ އުދުވާނީ އަމަލުތަކުގެ ސަބަބުން، ހުރްމޫޒް ކަނޑުއޮޅި ސަރަހައްދުގައި އިންޑިއާގެ ދިދަ ޖަހާފައިވާ 37 އުޅަނދެއް ތާށިވެއްޖެއެވެ. އިސްރާއީލުން ފަލަސްތީނާއި އަދި މުޅި ސަރަހައްދުގެ ހަމަޖެހުން ނަގާލުމަށް ކުރަމުންދާ މަސައްކަތްތަކާ ގުޅިގެން އުފެދިފައިވާ މި ނުރައްކާތެރި ހާލަތުގައި، އިންޑިއާގެ 1،109 ފަޅުވެރިން ވަނީ ބަންދުވެފައެވެ.
ޕާޝިއަން ގަލްފާއި ގަލްފް އޮފް އޯމާން ސަރަހައްދުގައި ތާށިވެފައިވާ މި އުޅަނދުތަކުގެ ތެރޭގައި މުދާ ބަރުކޮށްގެން ތިބި އުޅަނދުތަކާއި މުދާ ބަރުކުރުމަށް މަޑުކޮށްގެން ތިބި އުޅަނދުތައް ހިމެނެއެވެ. މިއީ އިންޑިއާގެ ވިޔަފާރިއަށާއި މުދާ އުފުލުމުގެ ނިޒާމަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި މީޑިއާތަކުން ވަނީ ފާހަގަކޮށްފައެވެ. މި ހާލަތާ ގުޅިގެން އިންޑިއާގެ ޝިޕިންގް އެސޯސިއޭޝަނުން ވަނީ، ފަޅުވެރިންގެ ސަލާމަތްތެރިކަން ކަށަވަރުކޮށްދިނުމަށް އެގައުމުގެ ސަރުކާރުގައި އެދިފައެވެ.
މި މައްސަލަ އިތުރަށް ގޯސްވީ، އީރާނުގެ އިސްލާމިކް ރިވަލިއުޝަނަރީ ގާޑް ކޯޕްސް (އައިއާރްޖީސީ) އިން މާޗް މަހުގެ 2 ވަނަ ދުވަހު ހުރްމޫޒް ކަނޑުއޮޅި ބަންދުކޮށް، އެ ސަރަހައްދުން ދަތުރުކުރާ އުޅަނދުތަކަށް ހަމަލާދޭނެ ކަމުގެ އިންޒާރު ދިނުމާ ގުޅިގެންނެވެ. މިއީ އިސްރާއީލާއި އެމެރިކާގެ ނުފޫޒާ ދެކޮޅަށް އީރާނުން އަޅާފައިވާ ފިޔަވަޅެކެވެ.
އިންޑިއާއަށް އެތެރެކުރާ ސާފުނުކުރާ ތެލުގެ 46 އިންސައްތަ އަންނަނީ މި ކަނޑުއޮޅި ހުރަސްކޮށް ކަމަށްވާއިރު، އިސްރާއީލުގެ އަމަލުތަކުގެ ސަބަބުން މަސްރަހު ގޯސްވުމަކީ އިންޑިއާގެ އިންފްލޭޝަން މައްޗަށް ގޮސް އިގްތިސާދަށް ބޮޑެތި ލޮޅުންތަކެއް އަރާނެ ކަމެކެވެ.
އިންޑިއާ ސަރުކާރުން މި މައްސަލަ ގާތުން ބަލަމުންދިޔަ ނަމަވެސް، 1000 އަށްވުރެ ގިނަ ފަޅުވެރިން ސަލާމަތްކުރުމަށް އަޅާނެ ވަކި ހާއްސަ ފިޔަވަޅުތަކެއް އަދި ރަސްމީކޮށް ހާމަކޮށްފައެއް ނުވެއެވެ.
އިންޑިއާއަކީ އިރާނާއި ދެކޮޅަށް އިޒްރޭލާއި އެމެރިކާއިން ހިންގަމުންދާ އުދުވާނުގައި އިރާންއާއި ދެކޮޅަށް އިޒްރޭލަށް ވާގިވެރިވަމުން އަންނަ ގައުމެކެވެ.
