އިންޑިއާ ސަރުކާރުގެ ރަސްމީ ދައުވަތެއްގައި ދަތުރުކުރި އިރާންގެ މަނަވަރެއް ފައްތާލުމާ ގުޅިގެން، ބޮޑުވަޒީރު ނަރެންދުރަ މޯދީއަކީ އެއްވެސް ބާރެއް ނެތް "ސުއިޕެއް" ނުވަތަ ބަލިކަށި މީހެއްގެ ގޮތުގައި އިންޑިއާގެ ގިނަ ބަޔަކު ސިފަކުރަން ފަށައިފިއެވެ.
މި ހާދިސާ ހިނގާފައިވަނީ އިންޑިއާގެ ކަނޑުގެ ސަރަހައްދަށް އިރާންގެ މަނަވަރު ވަދެފައިވަނިކޮށެވެ. ނަމަވެސް، އެމެރިކާއާއި އިޒްރޭލުން އިރާނާ ދެކޮޅަށް ހިންގަމުންދާ ލާއިންސާނީ އުދުވާނަށް ވާގިވެރިވުމުގެ ގޮތުން، އިންޑިއާގެ ސަރަހައްދުގެ ތެރެއިން މި މަނަވަރު ފައްތާލުމަކީ މޯދީ އިސްވެ ހުރެ ހިންގި ޣައްދާރު އަމަލެއްގެ ގޮތުގައި ގިނަ ފަރާތްތަކުން ދަނީ ތުހުމަތު ކުރަމުންނެވެ.
މިކަމާ ގުޅިގެން އިންޑިއާގެ އާންމުންނާއި ސިޔާސީ މުރާސިލުން ބުނަމުންދަނީ، މޯދީއަކީ އެމެރިކާއާއި އިޒްރޭލުގެ ކުރިމަތީގައި ކުޑަކަކޫ ޖަހައިގެން ހުރި، ގައުމީ ސިޔާދަތު ހިމާޔަތްކުރުމުގެ ގާބިލުކަން ނެތް ވެރިއެއް ކަމަށެވެ. އަދި އަމިއްލަ ގައުމަށް މެހެމާނެއްގެ ގޮތުގައި ގެނައި ބަޔަކަށް ހިމާޔަތް ނުދެވި، އެމީހުންގެ މަނަވަރު ފައްތާލުމަށް ފުރުސަތު ދިނުމަކީ ބައިނަލްއަގުވާމީ މައިދާނުގައި އިންޑިއާ ލަދުގަންނަންޖެހޭ ފަދަ ކަމެއްގެ ގޮތުގައި އެ ފަރާތްތަކުން ސިފަކުރެއެވެ.
އިރާނާ ދެކޮޅަށް އެމެރިކާއާއި އިޒްރޭލުން ހިންގާ ނުބައި ރޭވުންތަކުގައި ބައިވެރިވެ، މޯދީ ވަނީ އިންޑިއާގެ އަވަށްޓެރި ގައުމުތަކާއި އިސްލާމީ އުންމަތުގެ ކުރިމަތީގައި އިތުބާރު ގެއްލިފައިވާ "ޣައްދާރެއް" ގެ ގޮތުގައި ފާހަގަވެފައެވެ. މި ހާދިސާއާއެކު، މޯދީގެ ސަރުކާރުގެ ޚާރިޖީ ސިޔާސަތަކީ ހަމައެކަނި ބޭރުގެ ބާރުތަކުގެ ރުހުން ހޯދުމަށް ކުރާ މަސައްކަތެއްކަން ހާމަވެފައިވާ ކަމަށް ބުނެ ގިނަ ބަޔަކު ދަނީ ނުރުހުން ފާޅުކުރަމުންނެވެ.
