ކޮންމެ އަހަރެއްގެވެސް އެއްފަހަރު އަހަރެމެން މުސްލިމުންނާ ރަމަޟާން މަސް ބައްދަލު ކުރާއިރު އަހަރެމެން ތިބެނީ އެކަމަކަށް ހޭވައްލާ ތައްޔާރުވެގެންނެވެ. ނަފްސު ހޭލައްވަން ލިބޭ ފުރުސަތުގެ ބޭނުން ހިފައިގެންނެވެ. ގެޔަަށް ފަރުނީޗަރާ އެހެނިހެން ސާމާނު އައުކޮށް، ގޭ ފާރު ތަކުގެ ކުލަ ބަދަލުކޮށް ޚަރަދުތައްކޮށް ނަގަނީ އެއްވެސްވިސްނުމެއް ހިޔާލެއް ނެތިއެވެ. ރޯދަމަސް އަންނާތީ ދެން ބަދިގެޔަަށް ޚަރަދެއްކޮށްނުލައި ވެސް އަންހެން ވެރިންނަށް މަޑުން ނުތިބެވޭނެއެވެ. މިއީ ހަމަ ރޯދަ މަސް ކައިރިވާއިރު ކަންކަން ކުރަމުން އައި އަނެއްހެން ބުނާ ނަމަ ސަގާފަތެކެވެ.

ގޭތެރެ ސާފުކޮށްފައި ޖެހުނު ތާކަށް ކުނިތައް އުކާލަނީއެވެ، ދިވެހިންނަކީ ދިވެހިންނެވެ. އެހެން ބަޔަކާ ދޭތެރޭ ވިސްނާނުލައެވެ.

ރޯދަ ވީއްލުމަށް ކަމާކަން ފަށާފައި، އަންހެންވެރިންތައް ބަދިގެޔަށް ވަދެ، ހެދުނު މީރު އެއްޗެހި ހަދައެވެ. އެއީ ރޯދަ ވީއްލާ ގަޑީ ހުސްވިޔަސް ނުވިޔަސް ހެޔޮކަމަށެވެ. އިސްރާފްވެދާނެތީ ވިސްނަނީ ވަރަށްވެސް މަދުބަޔެކެވެ. ވާނީވެސް އެހެންތާއެވެ. ލިބޭތާ ލިބިގަންނަނީއެވެ. ފަލަސްތީނުގައި ރޯދަވީއްލުމަށް އެތައް ކުޑަކުދިންނެއް ކާނެ ބޯނެ އެއްޗެއް ނެތިގެން އުޅެއެވެ. ބޯނެ ފެންފޮދެއް ނެތިގެން އެހާލެއްގައި ކުޑަކުދިން އުޅޭއިރު ރާއްޖޭގަ ފެންވެސް ތައްޓަށް އަޅާފައި ނުބޮވުނީމާ އުކާލަނީއެވެ.

އެންމެ ފަހަރަކުވެސް ވިސްނާލާނަމައެވެ. އެއްވެސް މީހަކު ނުވިސްނާ ވާހަކައެއް ނޫނެވެ. ނަމަވެސް ގިނައީ އަހަރެމެން ދިވެހިންގެ ތެރޭގައި ނުވިސްނޭ މީހުންނެވެ.

ހާލަތު ހުރީ މިފަދައިންނެވެ.

ޔަހޫދީ އިސްރާއިލް ސިފައިންގެ ޝިކާރައަކަށް ވެފައިވާ ފަލަސްތީނުގެ ރައްޔިތުންނަށް މި ރޯދަ މަހުވެސް ހަމަ ޖެހިލައިގެން ނޭވާއެއްވެސް ލެވެން ނެތީއެވެ. މީގެ 4-5 ވަރަކަށް ދުވަސް ކުރިން އެ ގައުމުގެ ކުޑަކުދިންތަކެއް ވަނީ ހަނގުރާމަ ހުއްޓާލުމަށް ގޮވާލާ އިހްތިޖާޖްވެސް ކޮށްފައެވެ.

ބޭރުގެ ބައެއް ނޫސްވެރިންވެސް ފަލަސްތީނުގެ ކަންކަން އަހަރެމެންނާ ހަމަޔަށް ރިޕޯޓް ކުރަމުން އަންނަ އިރު އެމީހުންވެސް ސިފަކޮށްދެއްނީ ފަލަސްތީނުގެ ރައްޔިތުންގެ ހިތްވަރު ގަދަކަމެވެ. އެމީހުންގެ އީމާންތެރިކަމާއި އަޒުމު އެހާވެސް ވަރުގަދައެވެ.

ކާ އެއްޗެެއް ލިބުނަސް ނުލިބުނަސް އަޅުކަންތައް ކުރުމައިގެން ދެމިތިބެއެވެ. ރޯދަ މަހު ރޯދަ ހިފައެވެ.

ރޯދަވީއްލުމަށް އެ ގައުމަށް އެހީތެރިކަން ފޯރުކޮށްދެވޭނެ މިންވަރަކުން އެހިތެރިވާށެވެ. އާހިރުގައި މޮޅުވާނީ ތިމާ މީހާއެވެ.