ޤައުމު ހިންގަވަން އެނގިވަޑައި ނުގަންނަވަންޏާ އެންމެ ރަގަޅުވާނީ މަނިކުފާނު އިސްތިއުފާ ދެއްވުން ކަމަށް ވިދާޅުވެ ވެލިދޫ ދާއިރާގެ މެމްބަރު މުހައްމަދު އައްބާސްގެ ފާޑުވިދާޅުވުން ރައީސް މުހައްމަދު މުއިއްޒަށް އަމާޒުކުރައްވައިފިއެވެ.
އައްބާސްގެ ފާޑުވިދާޅުވުން އަމާޒުކުރައްވާފައިވަނީ، ގައުމުގައި ތެލުގެ ރިޒާވު ކަންބޮޑުނުވާ މިންވަރަށް އެބަހުރި ކަމަށާ އަދި ތެލުގެ އައު ޝިޕްމަންޓެއް އޮމާނުން ފުރައިގެން އަންނަ ބޯޓަކުން އިސާހިތަކު ގައުމަށް ވަންނާނެ ކަމަށް ރައީސް މުއިއްޒު ވިދާޅުވިތާ 72 ގަޑިއިރު ނުވާނީސް ތެލުގެ އަގު ސަރުކާރުން ބޮޑުކުރުމާ ގުޅިގެން ސޯޝަލް މީޑިޔާއަށް ދޫކުރެއްވި ޕޯސްޓެއްގައެވެ.
އައްބާސްގެ އެކްސް ހެންޑްލްގައި އޭނާ ވަނީ ރައީސް މުއިއްޒު ތަކުރާރުކޮށް ރައްޔިތުންނަށް އޮޅުވާލަމުންދާތީ ނުރުހުން ފާޅުކޮށް އެކަމުގައި ގިނަ ސުވާލުތަކެއް އަމާޒުކޮށްފައެވެ. އެގޮތުން އޭނާ ވަނީ، ސަރުކާރުން ތެލުގެ އަގު ބޮޑުކުރީ އަގުބޮޑުކޮށް ތެޔޮ ގަނެގެން ގެނައުމަށް ފަހުގައިތޯ ސުވާލު އުފައްދަވާފައެވެ.
އައްބާސް ވިދާޅުވީ، ރާއްޖޭގައި ހުރި ހުރިހާ ތެޔޮ ޓޭންކުތަކެއް ފުރެންދެން ތެޔޮ އެބަހުރި ކަމަށާއި، އަދި އިތުރު ތެޔޮ ޓޭންކަރެއް ބަރުކޮށްގެން ރާއްޖެއަށް އައުމަށް ފުރައިފި ކަމަށް މީގެ ކުރިން ރައީސް މުޢިއްޒު ވިދާޅުވެފައިވާ ކަމަށެވެ. އެހެންކަމުން، މިހާރު ކުއްލިއަކަށް ތެލުގެ އަގު ބޮޑުވެގެންދިޔަ ގޮތާމެދު އޭނާ ވަނީ ސުވާލު އުފައްދަވާފައެވެ.
ސިޔާސީ އެދުން އިސްކޮށް، އަބަދު ރައްޔިތުންނަށް ދޮގުބުނެ އޮޅުވާލުމަކީ އިންސާފެއްތޯ ސުވާލުކުރައްވަމުން އައްބާސް ވަނީ "ދޮގުބުނުމަކީ މަނިކުފާނުގެ ކަށީގައި ހިފާފައި ހުރި ކަމެއްތޯ" ރައީސްއާ ސުވާލު ކުރަށްވާފައެވެ. އޭނާ ވިދާޅުވީ ސަރުކާރުން އަގުބޮޑުކޮށް ތެޔޮ ވިއްކަންވާނީ އަގުބޮޑުކޮށް ތެޔޮ ގަނެގެން ގެނައުމުން ކަމަށް ގަބޫލުކުރައްވާ ކަމަށެވެ.
މީގެ އިތުރުން، ރައްޔިތުންނާމެދު ކުޑަކޮށްވެސް ވިސްނަވާ ނުލައްވައި ސަރުކާރުން މިފަދަ ނިންމުންތައް ނިންމުމުން، އާންމު ވިޔަފާރިތަކުން ހުރިހާ މުދަލެއްގެ އަގު ބޮޑުކުރާނެކަމީ ޔަގީންކަމެއް ކަމަށް އޭނާ ފާހަގަކުރެއްވިއެވެ. މީގެ ސަބަބުން ރައްޔިތުންގެ ދިރިއުޅުމުގެ ފެންވަރަށް ނޭދެވޭ އަސަރު ކުރާނެ ކަމަށްވެސް އައްބާސް ވިދާޅުވިއެވެ.
އައްބާސް މިފަދައިން ކަންބޮޑުވުމާ ނުުރހުން ފާޅުކުރައްވާފައިވާއިރު، ތެލުގެ ސްޓޮކް ރަނގަޅު ކަމަށާއި އެކަމުގައި ކަންބޮޑުވުމެއް ނެތް ކަމަށް ރައީސް މުއިއްޒު މި މަހުގެ 2 ވަނަ ދުވަހު ނޫސްވެރިންނާ ބައްދަލުކުރައްވާ ވިދާޅުވިއެވެ. ނަމަވެސް އޭގެ 72 ގަޑިއިރުވެސް ނުވަނީސް ސަރުކާރުގެ ތެޔޮ ކުންފުނީގެ މައި ކުންފުނި، އެސްޓީއޯއިން ވަނީ ތެލުގެ އަގު ބޮޑުކޮށްފައެވެ.
އެގޮތުން އީރާން ހަނގުރާމައާ ވިދިގެން ދުނިޔޭގައި ތެލުގެ އަގުތައް ރެކޯޑް އަދަދަކަށް ބޮޑުވެފައި ވަނިކޮށް އެސްޓީއޯއިން ނެރުނު ބަޔާނެއްގައި ބުނީ ބުދަ ދުވަހުން ފެށިގެން އެ ކުންފުނިން ވިއްކާ ޕެޓްރޯލާއި ޑީސަލްގެ އަގު ބޮޑުކުރަން ނިންމާފައިވާ ކަމަށެވެ. ޕެޓްރޯލާއި ޑީސަލް ވިއްކާނެ އާ އަގުތަކުގެ ގޮތުގައި އިއުލާންކޮށްފައިވަނީ، ޕެޓްރޯލް ލީޓަރަކުން 2.51ރ. އަގުބޮޑުކޮށް 16.01ރ. އަށް، އަދި ޑީސަލް: ލީޓަރަކުން 3.62ރ. ބޮޑުކޮށް 17.54ރ. އަށެވެ.
އެހެންކަމުން މިއީ ޕެޓްރޯލު ލީޓަރަކުން %18.6ގެ ބޮޑުވުމެކެވެ. އަދި ޑީސަލް ލީޓަރަކުން މިއީ %26ގެ ބޮޑުވުމެއްކަން ވެސް ފާހަގަކޮށްލެވެއެވެ.
މީގެ ކުރިން އެ ކުންފުނިން ޕެޓްރޯލް ލީޓަރެއް ވިއްކީ، 13.50ރ. އަށެވެ. އަދި ޑީސަލް ވިއްކީ ލީޓަރެއް 13.92ރ. އަށެވެ. މިއީ ރާއްޖޭގެ ތާރީޚުގައިވެސް އެސްޓީއޯއިން ވިއްކާ ތެލުގެ އަގު މިހާ ބޮޑު މިންވަރަކަށް އިތުރުކުރި ފުރަތަމަ ފަހަރެވެ.
