އީރާނުގެ ހުރިހާ ތެލެއް "އަތުލާނެ" ކަމަށް ބުނެ ހާމަކަން ބޮޑު ގޮތެއްގައި އެމެރިކާއިން އިންޒާރު ދީފިއެވެ. މިއީ ހަމައެކަނި ދަތިކުރުމުގެ ފިޔަވަޅު އެޅުމެއް ނޫނެވެ. މިއީ ބައިނަލްއަގުވާމީ ގާނޫނުތަކާ ހިލާފަށް ހިންގަން އުޅޭ ފޭރުމުގެ އަމަލެކެވެ.
މީގެ ކުރިން ވެނެޒުއެލާއާ މެދުވެސް މިފަދަ އިހާނެތި ގޮތްތަކަށް އަމަލުކޮށްފައިވާ އެމެރިކާއިން މިހާރު އަމާޒު ހިފާފައިވަނީ އީރާނަށެވެ. މިއާއެކު އެމެރިކާގެ އަސްލު މަގުސަދު މިވަނީ މުޅި ދުނިޔެއަށް ހާމަވެފައެވެ. މިއީ އެމެރިކާއާއި އިޒްރޭލުން ގުޅިގެން މެދުއިރުމަތީގެ މުއްސަނދިކަން ފޭރުމަށް ހިންގާ "ރިސޯސް ވާރ" ނުވަތަ ވަސީލަތްތައް މިލްކުކުރުމުގެ ހަނގުރާމައެކެވެ.
އެމެރިކާގެ ހަގީގީ އަމާޒަކީ އަބަދުވެސް ތެލެވެ. ނިއުކްލިއާ ހަތިޔާރު ނެތް ކޮންމެ ގައުމަކީ އެމެރިކާގެ މި އަނިޔާވެރި ލިސްޓުގައި ހިމެނޭ ގައުމުތަކެކެވެ. އިޒްރޭލުން ފަލަސްތީނުގެ ބިންތަކަށް އަރައިގަނެ ހިންގާ އުދުވާނުތަކަށް އެމެރިކާއިން ވާގިވެރިވަނީވެސް، މި ސަރަހައްދުގެ މުއްސަނދިކަމުގެ މައްޗަށް ބާރު ފޯރުވުމުގެ ނުބައި ނިޔަތުގައެވެ.
މިއަދު އީރާނާ ދެކޮޅަށް އެމެރިކާއިން މި ފަށާފައިވާ މަސައްކަތަކީ، އިސްލާމީ ގައުމުތަކުގެ އިގްތިސާދު ސުންނާފަތިކޮށް، އެ ގައުމުތަކުގެ ގުދުރަތީ ވަސީލަތްތައް ފޭރިގަތުމަށް ހިންގާ ވަރަށް ނުރައްކާތެރި އުދުވާނެކެވެ.
