ރައީސް ޑރ.މުހައްމަދު މުއިއްޒުގެ ވެރިކަމުގެ ސަތޭކަ ދުވަހަށް އެކުލަވާލި ވައުދުތަކުގެ ތެރެއިން ބައެއް ވައުދު އަދިވެސް ފުއްދިފައިނުވާކަން ހާމަވެއްޖެއެވެ.

ހަފްތާ 14 ގެ ނަމުގައި އެކުލަވާލާފައިވާ ޕޯޓަލް އިން ދައްކާގޮތުން ބައެއް ވައުދުތަކުން ފުއްދިފައި ހުރީ ވަކި ވަރެއްގެ އިންސަތައެކެވެ.

އެގޮތުން މިނިވަންކަމާއި ސިޔާދަތުގެ ބައި ގައި އެކުލަވާލެވިފައިވާ 3 ވައުދު ތެރެއިން އެއް ވައުދެއް ކަމަށްވާ ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަރނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް)އިން ކޮށްފައިވާ ޙުކުމް އިސްތިޢުނާފުކުރުން، ފުއްދިފައިވަނީ އެންމެ 80 އިންސައްތަކަން ފާހަގަކޮށްލެވެއެވެ.

ގެދޮރުވެރިކަމާއި އުމްރާނީ ތަރައްގީގެ ބަޔަށް އަލިއަޅުވާލިއިރު، 38 ވައުދު ހިމެނެއެވެ. ބޯހިޔާވަހިކަމަށް ޚާއްޞަ "ގެދޮރުވެރިކަމުގެ ޓްރަސްޓް ފަންޑް"އެއް ޤާއިމުކުރުމަށް ބޭނުންވާ އޮނިގަނޑު އެކުލަވާލުމާއި ބޯހިޔާވަހިކަން ފޯރުކޮށްދިނުމަށް %5 އިންޓަރެސްޓުގައި ތަޢާރަފުކުރާ ލުއި ލޯނާބެހޭ ސިޔާސަތު އެކުލަވާލައި އާންމުކުރުން ވަނީ 99 އިންސައްތަ ފުރިހަމަކުރެވިފައެވެ. ނަމަވެސް އެއްކޮށް އެ ވައުދު ފުއްދަވާފައިނުވެއެވެ.

ހަމަ އެބައިގައި ހިމެނޭ އިތުރު ވައުދަކަށް ބަލާލިއިރު، މާލެ ސަރަހައްދަށް ދިމާވެފައިވާ އެއްގަމު އުޅަނދުފަހަރު ޕާކުކުރުމުގެ މައްސަލަޔަށް ޙައްލު ހޯދުމުގެ ގޮތުން ޕްލޭނެއް އެކުލަވާލައި، ހަދަންޖެހޭ ޕާކިން ޢިމާރާތްތަކެއް ބިނާކުރުމުގެ މަޝްރޫޢެއް ފެށުމުގެ މަސައްކަތް ކުރެވިފައިވަނީ 85 އިންސައްތަކަން ފާހަގަކޮށްލެވެއެވެ. މާލޭގައި ޕާކް ކުރާނެ ޖާގަ ނެތިގެން ނުގަވައިދުން އެކި އެކި ފަރާތްތަކުން ޕާކް ކުރަމުން އަންނާތީ ރައީސް މުއިއްޒު ވަނީ މީގެ ކުރިން އެގޮތައް ޕާކް ކުރުމުން ސްޓިކާ ނުޖަހާނެކަމަށް ވިދާޅުވެފައެވެ. ޕާކިން ސްލޮޓްތައް ހެދެންދެން، ސްޓިކާ ނުޖަހާނެކަމަށް ރައީސް ވިދާޅުވި ނަމަވެސް ހޯމްލޭންޑް މިނިސްޓަރ އިހްސާންގެ ރާގު އެކަމުގައިވަނީ ދާދި ފަހުން ތަފާތުވެފައެވެ. އެގޮތުން ނުގަވައިދުން ޕާކް ކުރަންޏާ އަނެއްކާވެސް ސްޓިކާ ޖަހަން ވަނީ ނިންމާފައެވެ.

ހަފްތާ 14 ގައިވާ 161 އެއް ވައުދު ތަކުގެ ތެރެއިން ހުރިހާ ވައުދެއްހެން ފުއްދިއްޖެކަމަށް ރައީސް ޑރ.މުއިއްޒު ވިދާޅުވަމުން އިތުރުފުޅު ހައްދަވަމުން އަންނައިރު އަދިވެސް ނުފުއްދޭ ވައުދުތައް އެ ޕޯޓަލް އިން ފެނެއެވެ.