ދިވެހިރާއްޖޭގެ ޖުޑިޝިއަރީ އޮތީ ބިރުން ސިހި ސިހި ކަމަށް ވިދާޅުވެ، ޝަރުއީ ނިޒާމަށް، ރައީސް އަބްދުﷲ ޔާމީންގެ އިސް ގާނޫނީ ވަކީލު، ޑރ. މުހައްމަދު ޖަމީލުގެ ފާޑުކިޔުން އަމާޒުކުރައްވައިފިއެވެ.
ޑރ. ޖަމީލުގެ ފާޑުކިޔުން ޝަރުއީ ނިޒާމަށާ ސަރުކާރަށް އަމާޒުކުރެއްވީ އެކްސްގައި ކުރެއްވި ޕޯސްޓެއްގައެވެ.
އެގޮތުން ރައީސް ޔާމީނަށް ދީފައިވާ ލުއިތައް މި ސަރުކާރުން ރިވިއު ކުރަން ފަށާފައިވާތީ އެކަމާ ނުރުހުން ފާޅުކުރައްވާ ޑރ. ޖަމީލު ވިދާޅުވީ، ކަރެކްޝަނުން ދައްކާފައި ވަނީ ބޭކާރު ވާހަކަތަކެއް ކަމަށެވެ. ރައީސް ޔާމީން އިސްތިއުނާފުގެ ހައްގުން މަހްރޫމްކޮށްފައި ކަމަށާ އެއީ ގާނޫނު އަސާސީގެ 56 ވަނަ މާއްދާ އިން ކޮންމެ ރައްޔިތަކަށް ލިބޭ އެންމެ އަސާސީ ހައްގެއް ކަމަށް ޑރ. ޖަމީލު ވިދާޅުވިއެވެ.
މީގެ އިތުރުން ޑރ.ޖަމީލު ވިދާޅުވީ ޔާމީންގެ އެ ހައްގު ހިފަހައްޓާފައި ވަނީ އެމަނިކުފާނުގެ ނަމުގައި ވެރިކަމަށް އައިސް އޮތް މިއަދުގެ ސަރުކާރުންނެވެ. ކުރީން އިސް ފަނޑިޔާރު ކަމާ ޖަސްޓިސް މިނިސްޓަރުކަން ވެސް ކުރެއްވި ޑރ. ޖަމީލް ޖުޑިޝަރީގެ މިއަދުގެ ހާލަތު ސިފަ ކުރެއްވީ ކަނު އަނދިރީ ގައި ބިރުން ސިހި ސިހި އޮތް ބާރެއްގެ ގޮތުގައެވެ.
ޑރ. ޖަމީލު ވަނީ ރައީސް ޔާމީންގެ އިސްތިއުނާފު އަވަސް ކުރަން ތަކުރާރުކޮށް އެދެމުންދާ ކަމަށްވެސް ވިދާޅުވެފައެވެ.
ރައީސް ޔާމީންއަށް ލުއި ދީ ގެއަށް ބަދަލުކުރީ ކުރީ ސަރުކާރަށް ރިޔާސީ އިންތިހާބުގައި ނާކާމިޔާބުވެ ގޮތް ހުސްވުމުންނެވެ. މި ސަރުކާރުން ރައީސް ޔާމީން މިނިވަން ނުކުރާތީ އާއި އެމަނިކުފާނަށް އިތުރު ލުއިތަކެއް ނުދެއްވާތީ ސަޕޯޓަރުން އެކަމުގެ ނުރުހުން އަންނަނީ ފާޅުކުރަމުންނެވެ.
