އިންޑިއާގެ ގޭޓު ބާސްމަތީ ހަނޑުލުގައި ވިހަ މާއްދާއެއް އެކުލެވޭ ކަމާ އޭގެ ސަބަބުން ސިއްހީ ގޮތުން ބޮޑެތި މައްސަލަތައް ކުރިމަތިވެދާނެ ކަމަށް ހާމަކޮށްފިއެވެ.
އިންޑިއާގެ ފިޓްނެސް ޓްރެއިނަރއެއް ކަމަށާވާ ދީޕަކް ތަކްރާން އޭނާގެ ފޭސްބުކްގައި ޝެއަރ ކޮށްފައިވާ ވީޑިއޯއެއްގައި ހާމަކޮށްފައިވާ ގޮތުގައި، އިންޑިއާ ގޭޓު ބާސްމަތީ ހަނޑުލުގެ ތަހުލީލުތަކެއް އޭނާ ކުރުވާފައިވާ ކަމަށާ އެ ތަހުލީލުތަކުން ހާމަވާ ގޮތުގައި، ފުޑް ސޭފްޓީ އެންޑް ސްޓޭންޑާޑް އޮތޯރިޓީސް އޮފް އިންޑިއާ (އެފްއެސްއޭއައި)ގެ މިންގަނޑުތަކާ ޚިލާފުކަމަށެވެ. އެގޮތުން އެ ހަނޑުލުގައި ތިއޮމެތިއޮއެކްސެމް ކިޔާ ޕެސްޓިސައިޑް ހަނޑުލުގައި ހިމެނޭ ކަމަށާ އެފްއެސްއެސްއޭއައިގެ މިންގަޑަށް ވުރެ އެ ޕެސްޓިސައިޑްގެ މިންވަރު ހަނޑުލުގައި 2.5 ގުނަ އިތުރު ކަމަށް ވެސް ހާމަކޮށްފައިވެއެވެ.
ތަހުލީލުތަކުންނާ އަދި ސިއްހީ ދިރާސާތަކުން ވެސް ދައްކާ ގޮތުގައި އެ ޕެސިޓިސައިޑުގެ ސަބަބުުން ނާރުގެ ނިޒާމަށާ ސިކުނޑީގެ ހެދި ބޮޑުވުމަށް އަސަރުކުރުވާ ކަމަށާ ކުރީގެ ބެޗުތަކަށް ވުރެ މިހާރު ބާޒަރަށް ނެރެމުންދާ ބާސްމަތީ ހަނޑުލުގައި މި ޕެސްޓިސައިޑުގެ މިންވަރަށް އިތުރުވަމުން އަންނަކަން ވެސް ދީޕަކުގެ ވީޑިއޯގައި ހާމަކޮށްފައިވެއެވެ.
އިންޑިއާ ބާޒަރުގައި އެއް ނަމްބަރު ބާސްމަތީ ހަނޑުލުގެ ގޮތުގައި ގިނަ ބަަޔަކު ގަބޫލުކުރާ އިންޑިއާ ގޭޓު ބާސްމަތީ ހަނޑުލަކީ ރާއްޖޭގައިވެސް ގިނަ ބަޔަކު ބޭނުން ކުރާ ހަނޑުލަކަށްވުމުން މިއީ ސަމާޅުވާން ޖެހޭ ކަމެކެވެ. މިކަމާ ގުޅިގެން އަދި ރާއްޖޭގެ ސިއްހީ އިދާރާއަކުން އެއްޗެއް ހާމަކޮށްފައިނުވެއެވެ.
