ކަރަންޓު ބިލުތަކަށް އިތުރު ޑިސްކައުންޓެއް ދިނުމަކީ ސަރުކާރުގެ ސިޔާސަތެއް ނޫން ކަމަށް ފިނޭންސް މިނިސްޓަރު ވިދާޅުވުމާ ގުޅިގެން، ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް، ރައީސް ޑރ. މުހައްމަދު މުއިއްޒުގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.
މަލީހް މިފަދައިން ވިދާޅުވީ، ކަރަންޓު ބިލްތައް އިންތިހާއަށް ބޮޑުވެފައިވާ ދަނޑިވަޅެއްގައި، އިތުރު ޑިސްކައުންޓެއް ދިނުމަކީ ސަރުކާރުގެ ސިޔާސަތެއް ނޫން ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވުމާ ގުޅިގެންނެވެ. މަލީހް ކުރެއްވި އެކްސް ޕޯސްޓެއްގައި ވިދާޅުވީ، ރައްޔިތުންނަށް ކުރިމަތިވެފައިވާ ދަތި އުނދަގޫތަކުން ސަލާމަތްކޮށްދިނުމަށް މި ސަރުކާރުން މަސައްކަތް ނުކުރާނެކަން މިހާރު ރަސްމީކޮށް އިއުލާންކޮށްފައިވާ ކަމަށެވެ.
މީގެ އިތުރުން، ސަރުކާރުގެ އިސްވެރިންނަށް ނިސްބަތްކުރައްވާ މަލީހް ވިދާޅުވީ "ކޭކޭ" ދައުލަތް ހުސްކޮށްލާފައިވާ ކަމަށާއި، މުޅި ސަރުކާރުގެ ތެރޭގައި އޮތީ ކޮރަޕްޝަން ކަމަށެވެ. ކަރަންޓު ބިލްތައް ބޮޑުވެގެން އާންމު ރައްޔިތުން ޝަކުވާ ކުރަމުންދާ މި ދަނޑިވަޅުގައި، ސަރުކާރުން އެކަމަށް ލުޔެއް ދިނުމުގެ ބަދަލުގައި ދެއްކި އުޒުރުތަކަކީ ރައްޔިތުންނަށް ދެވޭ ވަރަށް ބޮޑު އިހާނެތްތެރިކަމެއްގެ ގޮތުގައި މަލީހް ވަނީ ސިފަކުރައްވާފައެވެ.
