ކުރީގެ ތިން ރައީސުން ރައީސް ޑރ މުހައްމަދު މުއިއްޒަށް ޝުކުރު އަދާކުރަން ޖެހޭ ކަމަށް ޕީއެންސީގެ ޕީޖީ ލީޑަރު އިބްރާހިމު ފަލާހު ބުނެފައިވާވުމަށް ޕީއެންއެފްގެ ރައީސް، ރައީސް އަބްދުﷲ ޔާމީން ރައްދު ދެއްވައިފިއެވެ.
ގައުމުގައި ބޮޑު ދަރަނިތަކެއް އޮއްވާ ވެރިކަމަށް ވަޑައިގެން ރައީސް މުއިއްޒު އެ ދަރަނިތައް ދައްކާ ޚަލާސްކޮށް ނިންމަމުންދާ ކަމަށާ އެކަމަށް ކުރީގެ ތިން ރައީސުން ރައީސް މުއިއްޒަށް ޝުކުރު އަދާ ކުރަން ޖެހޭ ކަމަށް ފަލާހު ވަނީ ބުނެފައެވެ.
އެކަމަށް އިޝާރާތްކުރައްވާ ރައީސް ޔާމީން ވިދާޅުވީ، ގައުމެއްގައި ނަމަ ދަރަނި އޮންނާނެ ކަމަށާ އެއިން ކޮންމެ ދަރަންޏަކީ ވާރުތަވަމުން ސަރުކާރުތަކަށް އަންނަ އެއްޗެއް ކަމަށެވެ. އަދި އެ ދަރަނި ދެއްކުމަކީ އޭރެއްގައި ދައުލަތާ ހަވާލުވާ ސަރުކާރުގެ ވެރިންގެ ޒިންމާއެއް ކަމަށާ އެއީ ކޮންމެހެން މޮޅުކަމެއްގެ ގޮތުގައި ދެކި އެކަން ޕްރޮމޯޓުކޮށް މެޑަލް ޖެހުން ނޯންނަ ކަމަށްވެސް ރައީސް ޔާމީން ވިދާޅުވިއެވެ.
އިތުރަށް ރައީސް ޔާމީން ވިދާޅުވީ ކާޅު ހާލި ހެދީމާ ކޮވެލި ބިސް އަޅާ ވާހަކަ އެންމެން ވެސް އަޑު އަހާނެ ކަމަށެވެ. އަދި ރައީސް ޔާމީން ވަނީ އިގްތިސޯދީ ވާހަކަ ފަލާހު ނުދައްކަން އިލްތިމާސްކުރައްވާފައެވެ.
ރައީސް ޔާމީން ވިދާޅުވީ ސަރުކާރުގައި މޮޅުގެ ކަންފުޅެއް ހުރި ނަމަވެސް 3 އަހަރުވެގެންދާއިރު އިގްތިސޯދުގެ ޗާލާކީކަން ފެނިގެންދާނެ ކަމަށެވެ.
