ހުޅަނގު ޔޫރަޕްގެ ގައުމުތަކަށް ކުރިމަތިވެފައިވާ އާދަޔާ ހިލާފަށް ހޫނުގަދަ މޫސުމުގެ ސަބަބުން، ހޫނުމިން 40 ޑިގްރީ ސެލްސިއަސްއަށް ވުރެ މައްޗަށް ގޮސް، މިހާތަނަށް ދިހަވަރަކަށް މީހުން މަރުވެއްޖެއެވެ.
މިދިޔަ ހަފުތާއިން ފެށިގެން ކުރިމަތިވަމުންދާ މި ނުރައްކާތެރި ހޫނު ރާޅުގެ އަސަރު މިހާރު ދަނީ އިރުމައްޗަށް ދަތުރުކުރަމުންނެވެ. މޫސުމާ ބެހޭ މާހިރުން ލަފާކުރާ ގޮތުގައި ކުރިއަށް އޮތް ދުވަސްތަކުގައި ޖަރުމަނާއި ޕޮލެންޑުގެ ފިނިހޫނުމިންވެސް ރެކޯޑް މިންވަރަކަށް މައްޗަށް ދާނެއެވެ.
މިހާ ގިނަ އަދަދަކަށް މީހުން މަރުވާން މެދުވެރިވީ ކުއްލިއަކަށް ފިނިހޫނުމިން މައްޗަށް ގޮސް، މީގެ ކުރިން ރެކޯޑް ކުރެވިފައި ނުވާ ފަދަ ގަދަ ހޫނެއް ސަރަހައްދަށް ފެތުރުމުގެ ސަބަބުންނެވެ. މި ހާލަތާ ގުޅިގެން ކަމާބެހޭ އިދާރާތަކުން ދަނީ ރައްކާތެރިކަމުގެ ފިޔަވަޅުތައް އެޅުމަށް އިރުޝާދު ދެމުންނެވެ.
މި ގަދަ ހޫނުގެ ސަބަބުން ބައެއް ގައުމުތަކުގައި ވަނީ ރެޑް އެލާޓް ނެރެފައެވެ. އަދި އާންމުން ބޭރަށް ނުނިކުތުމަށާއި، ގިނައިން ފެން ބުއިމަށް ސިއްހީ މާހިރުން ދަނީ އިރުޝާދު ދެމުންނެވެ.
