"ބިންވެރިޔާ ސްކީމް" ގެ ދަށުން ގޯތި ލިބުނު މީހުންނަށް ވީހާވެސް އަވަހަށް ބިން ހަވާލުކުރުމުގެ މަސައްކަތް ކުރަމުންދާ ކަމަށް އެޗްޑީސީިން ބުނެފިއެވެ.

ނިމިދިޔަ ސަރުކާރުން ބިންވެރިޔާ ސްކީމް ގެ ނަމުގައި މާލޭގައި މާލޭ ރައްޔިތުންނަށް ގޯތި ދޫކުރުމަށް ހިންގި ސްކީމްގައި ހުޅުމާލެއިން ގޯތި ލިބުނު ހުރިހާ ފަރާތްތަކަށް ގޯތީގެ އިން ވަކިކޮށް ބިން ހަވާލުކޮށްފައެއް ނުވެއެވެ.

އެގޮތުން އިން ވަކިކޮށް ހަވާލު ނުކޮށް ހުރި ހުޅުމާލޭގެ ބިންތަކަކީ މިހާރު ސިމެންތިއާއި ހިލަވެލި އަދި ކުނި ބުނި އަޅާފައިވާ ތަންތަނެވެ.

އެޗްޑީސީން މައުލޫމާތު ދިންގޮތުގައި އެ ސަރަހައްދުގައި ހުރި ވެލިފުނިތައް ނަގާ ތަން ސާފުކޮށް ވީހާވެސް އަވަހަށް ބިމުގެ ހައްޤުވެރިންނަށް އެ ބިން ދިނުމުގެ މަސައްކަތް އެ ކޯޕަރޭޝަނުން ދަނީ ކުރަމުން ކަމަށެވެ.

ބައެއް ގޯތިތައް މިހާރު އިން ވަކިކޮށް ބައެއް ގޯތިތަކުގެ އިންފާރުވެސް ވަނީ ރާނާފައެވެ. އެހެންނަމަވެސް ބައެއް ފަރާތަތަކަށް އަދި ބިން ހަވާލެއް ނުކުރެވެނީ އެބިން ސާފު ނުކުރުމުގެ ސަބަބުން ކަމަށް އެޗްޑީސީން ވަނީ ބުނެފައެވެ.

އަދި ކުރީ ސަރުކާރުން ގޯތިދިންއިރު މަގުތަކަށް އަރާގޮތަށް އެއްވެސް ތަރުތީބެއް ނެތި ގޯތި ދޫކޮށްފައިވާ ކަމަށްވެސް ބުނެފައިވެއެވެ.

އެހެންކަމުން އެކަންތައް ހަމަޔަކަށް އަޅުވައި ކުރަންޖެހޭ އެހެނިހެން މަސައްކަތްތައްވެސް ކުރަމުން އަންނަ ކަމަށް އެޗްޑީސީއިން ވަނީ ބުނެފައެވެ.