މާލެ ސިޓީ ކައުންސިލް ހަވާލުކުރާށޭ ކިޔާ ތާލަފިލި ފުމުނީމަ ހެދޭނީ ހެޑްލައިން ކަމަށާ ނަތީޖާ ނުކުންނާނީ ގާނޫނުގައި އޮތް ގޮތަށް އަމަލުކޮށްގެން ކަމަށް ގައުމީ މޭޔަރަލް ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
ޒަރިޔަންދުގެ ކެމްޕެއިން ހަރަކާތެއްގައި ވާހަކަދައްކަވަމުން އޭނާ ވިދާޅުވީ އެއްވެސް ވާދަވެރި ކެންޑިޑޭޓަކަށް ބަދު ބަހެއް ބުނަން ބޭނުން ނޫންކަމަށާ ނަމަވެސް ކަންކަން ހިނގަމުންދާ ގޮތުން ބައެއް ފަހަރު ބަސް ނުބުނ ހަނު ހުންނަންވެސް އުނދަގޫ ކަމަށެވެ. އެގޮތުން އޭނާ ވަނީ ދާދި ފަހުން މިހާރު މާލޭގެ މޭޔަރު ކަމުގައި ހުންނެވި އާދަމް އާޒިމް އެޗްޑިސީގެ އިހުތިސޯސުން ހުޅުމާލެ ވަކިކުރަން ވަކާލާޔު ކުރަމުންދާ ދިއުމަށް ނަޒަރެއް ހިންގާފައެވެ.
ޒަރިޔަންދު ވިދާޅުވީ، އެޗްޑިސީ ކުރިމަތީ މޭޔަރ އާޒިމް ހުންނަވާ ހުޅުމާލެ މާލެ ސިޓި ކައުންސިލްއާ ހަވާލުކުރުމަށް އަޑު ގަދަކުރާއަކުން ގޮވަމުންދިޔަ ކަމަށާ ނަމަވެސް އެއީ އެކަން ކުރަން އޮންނަ އުސޫލު ނޫން ކަމަށެވެ. ޒަރިޔަންދު ވިދާޅުވީ ހުޅުމާލެއަކީ ގާނޫނުންވެސް މާލެ ސިޓީ ކައުންސިލްގެ އިހުތިސޯސުގައި އޮންނަ ތަނެއް ކަމަށާ ހުޅުމާލެ އެޗްޑީސީއާ ހަވާލުކުރީ 2009 ވަނަ އަހަރު ތންތަރައްގީ ކުރުމަށް ކަމަށެވެ. އޭގެ ފަހުން 2011 ވަނަ އަހަރު ވުޖޫދުވެގެން އައި ގާނޫނުގައިވެސް ހުޅުމާޅޭގެ މުނިސިޕަލް ހިދުމަތް މާލެ ސިޓީއިން ދޭން ޖެހޭ ގޮތް ނޫން އެހެން ގޮތަކަށް ބަޔާންވެފައި ނެތް ކަމަށްވެސް ޒަރިޔަންދު ވިދާޅުވިއެވެ.
އެހެންކަމުން މިހާރުން މިހާރަށްވެސް އެ ހިދުމަތްތައް އެޗްޑީސީއިން އެ އިހުތިސޯސުތައް މާލެ ސިޓި ކައުންސިލްއާ ހަވާލުކުރަން ޖެހޭ ކަމަށާ މާލޭގެ މިހާރުގެ މޭޔަރުވެސް ގާނޫނުގައި އޮތްގޮތަށް އަމަލުކޮށް އެކަންކަން ކުރެވިދާނެ ކަމަށް ވެސް ޒަރިޔަންދު ވިދާޅުވިއެވެ. ޒަރިޔަންދު ވިދާޅުވީ ތާޅަފިލި ފުމެގެން ހެޑްލައިން ހެދިދާނެ ކަމަށާ ނަތީޖާއެއް ނުކުންނާނެ ކަމަށެވެ.
އެ ނަތީޖާ އޭނާގެ މޭޔަރުކަމުގައި ޙާސިލް ކުރާނެ ކަމަށާ އެކަން ކުރާނީ ގާނޫނުގެ މަގު އިހުތިޔާރުކޮށް ތަހުޒީބީ މުޖުތަމައެއްގެައި މުއާމަލާތްކޮށްގެން ކަމަށެވެ.
ޒަރިޔަންދު ވިދާޅުވީ އެކަންކަން ކުރާނީ އެޗްޑީސީއަށް އެ ކުންފުނީގެ ބާރުތަކަށްވެސް އިހުތިރާމުކޮށް އެ ބާރުތައްވެސް ދީގެން ކަމަށެވެ. ޒަރިޔަންދު ވިދާޅުވީ އޭނާގެ މޭޔަރުކަމުގައި ހައްގުތައް ކަށަވަރުކޮށްދޭނެ ކަމަށެވެ.
