ޔުނީފޯމް ބަދަލުކޮށްގެން މަދަނީންގެ ގޮތުގައި އިންޑިޔާގެ ސިފައިން އައިސް ރާއްޖޭގައި އުޅެން ނުޖެހޭކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ފްރޮންޓް އޮފީހުގައި އަންގާރަ ދުވަހު ބޭެއްވި ޖަލްސާގައި ޕޯޑިއަމްގައި ހުންނެވި ފަރާތަކަށް ސުވާލު އަމާޒުކުރައްވަމުންނެވެ.

އެގޮތުން އެމަނިކުފާނު ވިދާޅުވީ ރާއްޖޭގައި ގާއިމްވެފައި ތިބި އިންޑިޔާ ސިފައިން އެ ގައުމަށް ފޮނުވާނުލެވިގެން އުޅޭ ސަބަބު ހާމަނުވާކަމަށެވެ.

އެމީހުން ދުއްވާ ހެލިކޮޕްޓަރު ތަކުގެ ބޭނުމެއް މިއަދު ރާއްޖޭގައި ނެތްކަމަށް ވިދާޅުވެ، ރާއްޖޭގައި މިހާރު އެއާރ އެމްބިޔުލާންސެއް ތައާރަފް ކުރެވިފައިވާކަމަށްވެސް ރައީސް ޔާމީން ވަނީ ވިދާޅުވެފައެވެ.

ކުރިން އިންޑިޔާ ސިފައިން ތިބީ އެ ހެލިކޮޕްޓަރުތައް ދުއްވަން ކަމަށާއި އެ ހެލިކޮޕްޓަރުގައި ބަލިމީހުން އުފުލާތީ ކަމަށެވެ.

ނަމަވެސް މިއަދު އެކަމަށް ހައްލެއް ގެނެވިފައިވާއިރު އެމީހުން ޔުނީފޯމް ބަދަލުކޮށްގެން މަދަނީންގެ ގޮތުގައިވެސް ރާއްޖޭގައި ތިބެވިގެން ނުވާނެކަމަށް ރައީސް ޔާމީން ވަނީ ހިތްހަމަނުޖެހުން ފާޅުކުރައްވާ ވިދާޅުވެފައެވެ.

އޭގެއިތުރުން ރައީސް ޔާމީން ވަނީ އިންޑިޔާ ސިފައިން އަނބުރާ އެ ގައުމަށް ދިޔުމަށް ބުނަން ސަރުކާރަށް ޗެލެންޖްވެސް ކޮށްފައެވެ.

އެހެން ގައުމެއްގެ އަސްކަރިއްޔާގެ ބަޔަކު އާދައިގެ ހެދުމުގައިވެސް އައިސް މި ގައުމުގައި ތިބުމުން ރައްޔިތުން އެކަމާ ކަންބޮޑުވާނެކަމަށްވެސް އެމަނިކުފާނު ވަނީ ވިދާޅުވެފައެވެ.