749 ފަހަރެވެ. އެންމެ ސަތޭކައިގެ ވާހަކައެއް ނޫން އިނގޭތޯ. މި ދައްކަނީ އަޅުގަނޑުގެ ނޫސްވެރިކަމުގެ ހަޔާތުގައި ވެސް ވެރިޔަކު އެހާ ލަދުހަޔާތްކުޑަވެގެން ދިޔަ މަންޒަރުގެ ވާހަކައެވެ. 749 ފަހަރޭ އަޅުގަނޑު މިބުނީ ކީއްވެގެންކަމެއް އަދި ތިބޭފުޅުންނަށް ނޭނގިދާނެއެވެ. އެހެންކަމުން ތިފަރާތްތަކަށް އެނގޭނެ އެންމެ ފަސޭހައަށް ތިލަކޮށްދޭނަން. އާދެ.! ނިމިދިޔަ ރިޔާސީ އިންތިޚާބްގެ ކެމްޕެެއިން ދުވަސްވަރު، އާދެ ވެރިކަން ލިބުމުގެ ކުރިން "ރައީސް އަބްދުﷲ ޔާމީން އަބްދުލްގައްޔޫމް" މިފަދައިން އަދުގެ ރައީސް ވަޑައިގެންނަވާ ކޮންމެ ރަށެއްެގެ ކެމްޕެއިން ޖަލްސާގައި ވިދާޅުވެފައިވެއެވެ. މުޅި ޖުމްލަ އެމަނިކުފާނަށް ރައީސް ޔާމީންގެ ނަންފުޅު އިންތިޚާބްގެ އާދެ، ވެރިކަން ލިބުމުގެ ކުރިން ފާހަގަކޮށްފައިވަނީ 749 ފަހަރެވެ. ވެރިކަން ބޭނުންވެގެންވެސް ދެން މިވަރު ކުރޭހެއްޔެވެ.

އަޅުގަނޑުވެސް އަދުގެ ރައީސް ގެ ކެމްޕެއިން ދަތުރުތައް ކަވަރ ކުރުމަށްޓަކައި އެމަނިކުފާނު ވަޑައިގެންނެވި ގިނަ ރަށްރަށަށް ދިޔައީމެވެ. ޖަލްސާތަކުގައި ތަފާތީ ހަމަ އެކަނި މީހުންނެވެ. ޖަގަހަތައް ފަރުމާކޮށްފައި ހުންނަނީ ހަމަ އެ ޕީޕީއެމްގެ ފިޔާތޮށި ކުލައިންނެވެ. މެދުގައި ބަހައްޓާފައި ހުންނަނީ ރައީސް ޔާމީނަށް ޚާއްސަކޮށްފައިވާ އެމަނިކުފާނުގެ ނަންފުޅު ތަތްކޮށްފައި ހުންނަ ހުސް ގޮނޑިއެކެވެ. ޕޯޑިއަމްގެ ފަހަތުގައި ހުންނަނީ ޕޯސްޓަރެކެވެ. ޕޯސްޓަރުގައި ބޮޑުކޮށް ރައީސް ޔާމީންގެ ފޮޓޯފުޅުވާއިރު ކައިރީގައި އަދުގެ ރައީސް އަދި ނައިބު ރައީސްގެ ފޮޓޯވެއެވެ. މިއީ އަދި ވެރިކަމަށް އައުމަށް އަދުގެ ރައީސް ޑރ.މުހައްމަދު މުއިއްޒު ކުރެއްވި ވަރަށް ކުޑަ މިންވަރެކެވެ.

އެ ޕޯޑިއަމްތަކުގައި ދައްކާފައިވާ ވާހަކަތަކުގެ ވާހަކަ މި ރަމަޟާން މަހު ދައްކަންވެސް ހެޔޮނުވާނެއެވެ. އަސްތަގްފިރުﷲ. ހަދާލީ މޮޅެތި ބޮޑެތި ދޮގުތަކެވެ. ވެވަޑައިގެންނެވީ ދޯހަޅި ވައުދުތަކެވެ. އާދެ ވައުދުގެ ވާހަކަ ފާހަގަކުރެވުމުން، ރައީސް ޔާމީން މިނިވަންކުރައްވާނެކަމަށްވެސް ވައުދުވެވަޑައިގެންނެވީ ކިތައް ފަހަރުމަތިންކަމެއްވެސް ގުނާ އަދަދު ނުކުރެވޭނެއެވެ. އެމްޑީޕީގެ އިބްރާހިމް މުހައްމަދު ޞާލިހާ ހަމަ އެއްގޮތެކެވެ. ރައްޔިތުންނަށް އޮޅުވާލީ ރޯމާ ދުވާލެވެ. އަނެއްބައި ފަހަރު ހަނދުވަރު ދީފައި އޮންނަ އިރު އެ އަލީގައެވެ.

ރައީސް ޔާމީން ގާނޫނީ އިމުގެ ތެރެއިން މިނިވަންކޮށްދެއްވާނެކަމަށް އަޑުހަރުކޮށް ބޭއްވުނު ރިޔާސީ އިންތިޚާބްގެ ބަހުސްގައިވެސް ރައީސް މުއިއްޒު ވަނީ ވިދާޅުވެފައެވެ. ފާޑަކަށް ދެލޯ އަޅާފައި، ކުރީގެ ރައީސް އިބްރާހީމް މުހައްމަދު ޞާލިހް އަދި އެމްޑީޕީގެ ފަރާތުން ރިޔާސީ އިންތިޚާބްގައި ވާދަކުރެއްވި ކެންޑިޑޭޓާ ދިމާލަށް ނަޒަރު ހިންގާފައި ވިދާޅުވީ ރައީސް ޔާމީންގެ މައްޗައްކޮށްފަވަނީ ސިޔާސީ ހުކުމެެކެވެ.

މިއަދު އެ ސިޔާސީ ހުކުމާއި، ހަރާން ހުކުމާއި، ނުހައްގު ޖަލު ހުކުމާއި ވީ ސީދާ ޖަލު ހުކުމަކަށް. އެވާހަކަ ނުދައްކާތާ އެމަނިކުފާނުގެ ނަންފުޅުވެސް ގަނެނުލައެވެ.

އެ ހުސްގޮނޑި ވީ މަޝްހޫރެވެ. މިއަދު ރައީސް ޔާމީން އެއްވެސް މީހަކަށް ނުހަަދާ ވެރިކަން ލިބުމުން ނާޗަރަންގީ ކުޅެން އެންމެން އަވަދިނެތި އުޅޭއިރު ރައީސް ޔާމިނަށް ވަފާތެރި އެމަނިކުފާނަށް ތާއިދުކުރާ ފަރާތްތަކުން އަދިވެސް ގެންދަވަނީ އެ ހުސްގޮނޑި ސަރުކާރުގެ ވެރިންނަށް ދައްކާލަމުންނެވެ.

އެގޮތުން ކުރިޔަށް އޮތް މަޖިލިސް އިންތިޚާބާ ދިމާކޮށް ރައީސް މުއިއްޒު ށ.ފުނަދޫ އަށް ވަޑައިގަތުމުން އެ ރަށުގެ ރައްޔިތުން ވަނީ ދިވެހި އާޓީސްޓެއްގެ އަމިއްލަ ރާގަކަށް ހަދާފައި ލަވައެއް ކަމަށްވާ ލޯބި ލޯބިން މި ލަވައިގައި ހިމެނޭ "ތީހޭ ކަލާގެ ޒާތަކީ ވެދިއުން ހެ ބޭވަފާ" މިތަން ކޮޅު އަޑު ގަދަކޮށް ޖަހާ ބަނދަރު ސަރަހައްދުގައި ރައީސް ޔާމީންގެ ނަންފުޅާއެކު ހުސް ގޮނޑި އުސް ބިނާއަކަށް އަރުވާ ބަހައްޓާފައެވެ. އަދި ގޮނޑިއަށް ހިޔާ ދިނުމަށް ރައީސް ޔާމީންގެ ނަންފުޅާ އެކު ކުޑައެއްވެސް ނަގާފައި ހުއްޓެވެ.

ހަގީގަތުގައިވެސް "ތީހޭ ކަލާގެ ޒާތަކީ، ވެދިޔުން ހޭ ބޭވަފާ"