ރައީސް އަބްދުﷲ ޔާމީންގެ ޝަރީއަތްތައް ކޯޓުތަކުގައި އަވަހަށް ކުރިއަށް ގެންދެވުނީ، ކޯޓުތަކުގައި ވަސީލަތް ގިނަވެގެންތޯ އައްސަވާ، އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ަޖމީލުގެ އަހުމަދުގެ ސުވާލެއް އަމާޒުކުރައްވައިފިއެވެ.

ޑރ. ޖަމީލު މިފަދައިން ސުވާލެއް އަމާޒުކުރެއްވީ އެކްސްގައި ކުރެއްވި ޕޯސްޓެއްގައެވެ.

ކޯޓުތަކަށް ބޭނުންވާ ވަސީލަތް ނުލިބޭނަމަ ޝަރީއަތްތައް އަވަސްވާނެ ކަމާމެދު އުންމީދު ނުކުރެއްވުމަށް ސުޕްރީމް ކޯޓުގެ އިސް ފަނޑީޔާރު ހުސްނުއް ސުއޫދު ހުކުމެއްގައި ވިދާޅުވެފައިވާތީ އެކަމަށް އިޝާރާތްކުރައްވާ ނުރުހުން ފާޅުކުރައްވަމުން ޑރ. ޖަމީލު ވިދާޅުވީ، ރައީސް ޔާމީނުގެ ޝަރީއަތްތައް ކޯޓުތަކުގައި ދިޔައީ "ރޮކެޓް ސްޕީޑު"ގައި ކަމަށެވެ. އަދި އެހެން އެކަން ކުރިއަށް ދިޔައި އޭރު އެއީ ވަސީލަތް ގިނަވެގެންތޯ ވެސް އައްސަވާފައިވެއެވެ.

ނަމަވެސް އިސްތިއުނާފީ މަރުހަލާ ދަނީ "ފިނިހަކަ ސްޕީޑުގައި" ކަމަށް ވިދާޅުވިއެވެ.

"ހަމަ އެ މައްސަލަގެ އިސްތިއުނާފު މިއަދު ފިނިހަކަ ސްޕީޑުގައި ޓަކަޓަކަ އަޅުވަނީ ވަސީލަތް މަދުވެގެންބާ؟،" ޖަމީލް ވިދާޅުވިއެވެ.

މީގެ އިތުރުން މިއަދުގެ ހަގީގަތަކީ ޖުޑިޝަރީއަކީ ވަކިފަރާތަކަށް ނުޖެހޭ ނުފޫޒުން މިނިވަން ބައެއް ކަމުގައި ދައްކަން އުޅުމަކީ ބިންމަތީގައި ތިބެގެން ހަނދަށް ކުޅު ޖަހަން އުޅުން ކަހަލަ ކަމެއްގެ ގޮތުގައި ޖަމީލްވަނީ ސިފަކުރައްވާފައެވެ.

ޑރ. ޖަމީލުގެ ނުރުހުން ޖުޑިޝީއަރީއަށް އަމާޒުކުރައްވާފައިވާއިރު، ރައީސް ޔާމީންގެ އިސްތިއުނާފު ނިމި 122 ދުވަސް ފަހނަ އަޅާ ގޮސްފައިވާއިރު އެ މައްސަލައިގައި އަދިވެސް ހުކުމްކޮށްފައިނުވެއެވެ.

މިކަމާ ގުޅިގެން ގިނަ ބައެއްގެ ނުރުހުން ދަނީ ސަރުކާރަށާ ޝަރުއީ ނިޒާމަށްވެސް އަމާޒުވަމުންކަން ފާހަގަކޮށްލެވެއެވެ.