ޕްރޮގްރެސިވް ޕާޓީ އޮފް މޯލްޑިވިސް (ޕީޕީއެމް)ގެ ފިކުރު މިހާރު ގައުމުން ނައްތާލަމުންދާ ކަމަށާ އެކަން ކުރަމުން ދަނީ ކުރިން އެ ފިކުރުގެ ހިޔަލުގައި ތިބެ ގައުމު ހަމަ މަގަށް އަޅުވަން ކަމަށް ބުނެ ނުކުތް މީހުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފުން މަޖިލިހަށް ކުރިމަތިލާ ކެންޑިޑޭޓުންގެ ސިޔާސަތުތައް ހާމަކޮށް ސުވާލާ ޖަވާބު އުސޫލުން ދަ ފްރޮންޓު އޮފީހުގައި ކުރިއަށް ގެންދާ ޖަލްސާތަކުގެ ތެރެއިން އަންގާރަ ދުވަހުގެ ރޭ ބޭއްވި ޖަލްސާގައި ތުލުސްދޫ ދާއިރާއަށް ކުރިމަތިލާ ކެންޑިޑޭޓު އަހުމަދު ޝާމިލު އަބްދުﷲ، ރާއްޖޭގައި އިންޑިއާ އައުޓު ގޮވި ބަޔަކަށް މިއަދު ގަރާރު ބަތިލުކުރަންވެސް ނުކެރިގެން އުޅޭ ކަމަށް ވިދާޅުވެ ފާޑުކިޔުމުން، ރައީސް ޔާމީންވަނީ ވެރިކަމަށް އައުމުގެ ކުރިން ސަރުކާރުގެ މިހާރުގެ ވެރިން ގެންގުޅުނު ސިޔާސަތުތައް މިހާރު ފެންނަމުން ނުދާތީ ކަންބޮޑުވުން ފާޅުކުރައްވާފައެވެ.

އެގޮތުން އިންޑިއާގެ ނުފޫޒުން ގައުމު ސަލާމަތްކޮށް އިންޑިއާ ސިފައިން ބާލާ ދިވެހިންގެ މިނިވަންކަން ދިވެހީންނަށް ހޯދައިދޭން އެންމެ ފުރަތަމަ ގައުމު އިސްކުރަން އައި ބަޔަކު ފެންނަމުން ދަނީ އިންޑިއާއަށް ބިރުން އުޅޭ މަންޒަރު ކަމަށާ އިންޑިއާ އައުޓު ގަރާރު ވެސް އެންމެ ކުޑަ މިނުން ބާތިލުކުރަން ނުކެރި ގައުމު އަނެއްކާވެސް އިންޑިއާގެ އަތްދަށު ލައްވަމުން ގެންދާ ކަމުގެ އިޝާރާތެއް ރައީސް ޔާމީން ވަނީ ކުރައްވާފައެވެ.

އެހެންކަމުން ފެންނަމުންދާ މަންޒަރުތަކަށް ބަލާއިރު ޕީޕީއެމް އިން އިސްކުރި އެންމެ ފުރަތަމަ ގައުމު ޝިއާރުގެ އެއްވެސް އޮއްޓަރެއް މިހާރު ފެންނަމުން ނުދާ ކަމަށް ވެސް ރައީސް ޔާމީން ފާހަގަކުރެއްވިއެވެ.

ރައީސް ޔާމީން މިފަދައިން ވިދާޅުވެފައިވާއިރު، އިންޑިއާ ސިފައިން ފުރތަމަ 100 ދުވަހުގެ ތެރޭގައި މި ގައުމުން ބޭރުކުރުމަކީ ރައީސް މުހައްމަދު މުއިއްޒުގެ ރިޔާސީ ވައެދެކެވެ. ނަމަވެސް ވެރިކަމަށް އައުމަށްފަހު ފެނިގެން ދިޔައި ހައި ލެވެލްގަެ މަޝްވަރާތަކެއްކޮށް މިހާރު އިންޑިއާ ސިފައިންގެ ބަދަލުގައި މަދަނީ މީހުންގެ ނަމުގައި އަނެއްކާވެސް ޑޯނިޔާ އާ ހެލިކޮޕްޓަރު ބަލަހައްޓަން ބަޔަކު ބައިތިއްބަން ނިންމި މަންޒަރެވެ.

މިއާ އެކު ގިނަ ބައެއްގެ ފާޑުކިޔުން އަމާޒުވެ ސަރުކާރުގެ މަގްބޫލުކަން ކުޑަ ދުވަސްކޮޅެއްގެ ތެރޭގައިވަނީ ކުޑަވެފައެވެ.