އަވަށްޓެރި ލަންކާގައި ވަރުގަދަ އަލިފާނުގެ ހާދިސާއެއް އިއްޔެ ހިނގައިފިއެވެ.
މި ހާދިސާ ހިނގާފައިވަނީ ލަންކާގެ ކޮލަމްބޯގެ ވެއްލަވައްތަ ނޯ ލިމިޓުގައެވެ.
މި ހާދިސާގެ ވީޑިއޯތައް މީސްމީޑީޔާގައި ދަނީ ދައުރުވަމުންނެވެ.
އެވީޑިއޯތަކުން ފެންނަ ގޮތުގައި ހެދުމުގެ ބާވަތްތައް ވިއްކާ ނޯލިމިޓުގައި އަލިފާން ރޯވުމާއެކު އަލިފާން ނިއްވާ މީހުން ހަރަކާތްތެރިވިއެވެ.
އަދި ބޯ ދުންގަނޑެއް މުޅި ސަރަހައްދުގައި ފެތުރިގެން ދިޔައެވެ.
ރިޕޯޓްތައް ބުނާގޮތުން ޖުމްލަ 11 ފަޔާ ޓްރަކުން ފެންޖަހުމުގެ މަސައްކަތް ކުރަމުން ދިޔަ އިރު އާންމުންގެ ގިނަ އަދަދެއްގެ ބަޔަކުވެސް އެހީތެރިވެ ދެމުން ގެންދިޔައެވެ.
ނަމަވެސް އަލިފާން ރޯވެ ނޯލިމިޓު ތެރޭގެ ހޫނުމިން މަތިވެފައި ވުމުން އެތާ އެތެރެއަށް ވަނުމުގައި ފަޔާފައިޓަރުންނަށް ގޮންޖެހުންތަކާ ކުރިމަތިވި ކަމަށް ވެސް އޮފިޝަލުންނާ ހަވާލާދީ ރިޕޯޓުތައް ބުނެއެވެ.
މިތަނަކީ ލަންކާގައި މުސްލިމުންގެ ބަޔަކު ހިންގަމުން އަންނަ ތަނެކެވެ.
