20 ވަނަ ރައްޔިތުންގެ މަޖިލިސް އިންތިހާބަށް ފަހު ސަރުކާރުން ރައްޔިތުންނަށް ދޭނީ ތެޔޮހަމެއް ކަމަށް ރައީސް އަބްދުﷲ ޔާމީން އަބްދުލްގައްޔޫމްގެ އިސް ގާނޫނީ ވަކީލް ޑރ.މުހައްމަދު ޖަމީލް އަހްމަދު ވިދާޅުވެއްޖެއެވެ.

ޑރ.ޖަމީލް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ޑރ ޖަމީލް ވިދާޅުވީ ޕީޕީއެމް ޙާލުގައި ވަނިކޮށް ބޮޑު ނަޞްރެއް ލިބުމުން މިއަދު ރައީސް ޑރ. މުހައްމަދު މުޢިއްޒު އެ ކާމިޔާބު މިންވަރުވި ގޮތް ހަނދާން ނައްތާލާފައިވާ ކަމަށެވެ.

މަޖިލިސް އިންތިޚާބު މި ސަރުކާރަށް ކާމިޔާބުވެއްޖެނަމަ ޢަދާވާތްތެރިކަން އިތުރަށް އިސްކުރާނެ ކަމަށާއި ރިޔާސީ އިންތިހާބަށް ފަހު ކުރީގެ ރައީސް އަބްދުﷲ ޔާމީނަށާއި ވައުދުތަކަށް ފުރަގަސްދިން ގޮތަށް، މަޖިލިސް އިންތިހާބަށް ފަހު ރައްޔިތުންނަށް ދޭނީ ތެޔޮހަމެއް ކަމަށްވެސް ޑރ ޖަމީލު ވިދާޅުވި އެވެ.

ވެރިކަމުގެ ފުރަތަމަ ދުވަހު ރައީސް ޔާމީން މިނިވަން ކުރައްވާނެ ކަމަށް ރިޔާސީ އިންތިހާބުގެ ތެރޭގައި ރައީސް މުއިއްޒު ވަނީ ވިދާޅުވެފަ އެވެ. އެހެންނަމަވެސް އެމަނިކުފާނު މިނިވަން ނުކުރެއްވިތާ އެމަނިކުފާނުގެ ޝަރީއަތްތައް ވެސް ހައި ކޯޓްގައި ވަނީ މަޑުޖައްސާލާފައެވެ.